Aizawl: Nimin khan Govt.J.Thankima College chuan Bawngkawn Brigade a an College ram hung (fencing) hnatlang an nei a. Zirtirtu leh zirlai thahnem tak an thawk chhuak a, hnatlang te hian College ramri chin zelah banril an phun a. Ngenna an lo thlen tawh angin Revenue Deptt. chuan helai ram chin hung hnatlangah hian College ram chin endik turin a endiktu Surveyor a tir bawk. February ni 20,2018 a College ram chhung nia hriat a awm R.Lalhmingliana te in luahlai mi tu tih hriatloh ten an thiat chu pawi a tih thu Gov't. J.Thankima College Principal Dr. C. Lalremruata chuan a sawi. A phalna lo va in thiattu te chu tute nge an nih a hriat loh thu a sawi a, an dinhmun hrechiagtu leh anmahni tantu  zinga mi tute emaw an nih a rin thu a sawi. Helai ram thubuai vanga tuartu R.Lalhmingliana te chhungkua chu an lainat thu leh College lam in a theih ang anga chhawmdawl an tum tih sawiin nimin hnatlangah hian an chenna in tur hi mumal zawkin inthiarna leh choka te siam sak an ni. Bawngkawn Brigade rama Govt. J.Thankima College Campus chhunga rambuai chungchangah hian Campus chhunga mimal in ding neitu B.Lalhmangaihi chuan court hniam zawk leh sang zawkah pawh helai ram buai chungchang hi a lo thlen tawh thin a, thubuai an thlen hnuhnung ber chu February ni 16, 2018 khan Gauhati High Court, Aizawl Bench chuan ngaihtuah zui tlak loh tiin a hnawl sak niin Principal hian a sawi bawk.