Thawhlehni zan khan Mizo tlangval hovin India-in SAFF Championship nomawi an la a, inkhelh tawpa sawi zui hlawh leh tun thleng pawha titi siamtu chu player pawimawh ber zinga mi, Jeakson Singh Thounaojam-a’n Meitei hnam puanzar (flag), Kangleipak flag tia sawi bawk nena nomawi a lawm kha a ni.

Kangleipak flag chu
Salai Taret flag tia an sawi bawk thin, Kangleipak flag hi ram dang tam zawkte flag ang bawka kil li nei, rectangle ang pian niin rawng chi sarihin a dung zawngin a tial.

Heng rawng sarihte hian hman lai Manipur rama Meitei lalram pasarihte entirna a ni.

Sawi zui hlawh thil
Thawhlehni zana Bengaluru, Karnataka-a Sree Kanteerava Stadium-a India-in SAFF Championship final-a Kuwait an hneh tum khan Meitei tlangval, Jaekson hian hnehna lawm nan a bat chhuak a, tun laia a chawr chhuahna state-ah Meitei leh tribal-te inkara buaina nasa tak a awm mek lai a nih avangin sawi zui a hlawh a, a bikin tribal hnam hrang hrangin an helh hle.

A hnampuite chuan Indian Super League-a Kerela Blasters defensive midfielder hi an lawm hle a rinawm laiin boruak inmung mek nen sawi zawm a hlawh zui ta si a, amah pawhin a hnu lawkah (Nilaini zing dar 2:11)-ah a social media account kaltlangin a chet dan a sawi fiah zui nghal ta reng a ni.

“Flag nena hnehna lawm kha tute rilru mah tihnat tumna a awm lo va, kan state, Manipur-in tuna buaina an tawh mek hi mite hriattir ka tumna a ni,” tiin amah leh India team tantute hnenah a sawi.

“Zanin hnehna kha Indian zawng zawngte tan a ni,” a ti bawk.

AIFF-in hma lak tum lo
Manipur-ah chi leh chi intihbuaina chhuak avanga mi 100 chuang an thih tawh laia khatiang thil tihlan khan sawi zui a hlawh si a, India ram football thuneitu sang, All India Football Federation (AIFF) pawh tawng lo thei lo an ni ta a; mahse, Manipuri star lakah hian a chet dan avanga hma lak zui tum a ni lo tih an sawi.

“Jaekson Singh Thounaojam-a hian chiang takin he thila a dinna a puang tawh a, a bak kalpui zui zel tumna a awm lo,” tiin Nilaini zan dar 8:15 khan Twitter-ah an tar lang a. An thuchhuahah hian Manipuri player thu chhuah tawh hi an tar lang tel bawk.

Mizo pa a che ta
Manipur-a chi leh chi inkara buaina chhuaka tuar nasa ber zinga mi chu Zohnahthlakte an ni a, Mizoramah pawh himna zawngin sang tam tak an tlan lut tawh.

Meitei tlangval kum 22 mi, Jeakson-a chet dan avanga AIFF-in hma lak zui a tum loh thu a puan hnuah Mizo pa a che ta a, India football hotu hnenah Manipuri player hi India ram tana khelhtir lo tura ngenna a thlen.

Mizoram Football Association (MFA)-a executive committee member tang lai, Joseph Lalrintluanga’n Zirtawpnia AIFF president hnena lehkha a thawnah hian, “Sports chuan inhmelmakna ni lovin, muanna a thlen zawk tur a ni,” tiin Jaekson-a hi ram tana fehchhuahtir lo turin a ti a ni.

Joseph-a hian a lehkhaah hian Manipur buainaah hian Jeakson-a hian flag chu Meitei duh dan (propaganda) puanna atan a hmang tih pawh a tar lang a, “Hei hi khawvel puma tribal sang tam takin an duh lo a ni,” a ti.

Buaina chhuak mekah hian India Under 17 team forward Thanglalsoun Gangte pawh Europe-a India tana a feh chhuah hlanin an chenna in halsak a ni a, a pate pawh thah a ni tih a tar lang a. “Thanglalsoun hian mi dang tam tak, Mizorama tlanchhiate ang bawkin hawna tur in a nei tawh lo,” a ti.

Football-a ngaihdan puan hi
Football chauh pawh a ni lo, infiamna huangah hian mi dangte pawhin an duh dan leh duh loh dan puangin eng eng emaw an lo tilang tawh thin.

Jaekson-a chet dan chungchangah hian India captain hlui, Bhaichung Bhutia chuan khawvel huap thila mi mal emaw, state emaw, pawl emaw flag pho chhuah chu ‘thil finthlak a ni lo’ tih chanchinbu mite hnenah a sawi.

Mi thiamte chuan Fifa pawhin team bungrua leh hmanrua (equipment)-a politics, sakhua, mi mal ngaihdan leh duh dan puan chhuah hrim hrim a khap niin an sawi.

MFA hruaitu, Joseph-a pawh hian AIFF chief hnena lehkha a thawnah hian Manchester City manager Pep Guardiola-a’n a chawr chhuahna, Spain-a Catalonia-a politics thil avanga mi tangte a thlawpna lantir nan ribbon eng a inbel a, hei vang hian Football Association (FA)-in a vaukhan niin a tar lang ve bawk.