NEW DELHI: Enforcement Directorate (ED) chuan kar hmasa lama Jahangiripuri-a chi leh chi inkara buaina chawkchhuaktu Ansar Sheikh chu a sum hmuhna chhui turin thupek a chhuah.            

Prevention of Money Laundering Act (PMLA) hmanga chhui tuin Delhi Police Commissioner Rakesh Asthana chuan central agency-ah case a ziak lut a. ED chuan Sheikh a sum neih dan hi an chhui bakah tualchhung buaina tihchhuah nana a sum hman dan te chhui an tum bawk a ni. 

Delhi Police te chuan an thil chhui atangin Sheikh hian ram dang atanga sum a hmu niin an ngai a, Halida, West Bengal-ah pawh in lian tak (mansion) a nei niin he case hrechiangtu tak officer pakhat chuan a sawi ve bawk.

Kar hmasa lama buaina thleng chungchang Delhi Police te chuan thil an chhui mek a, kha buaina a thlen hmaa a chet velna leh a phone call record te pawh an zirchiang mek a ni.

Sheikh hi thirchhia lakhawmtu niin, an chhungkua hian Jahangiripuri-ah an cheng a. Police te chuan kha intualvuakna chhuak avang khan National Security Act (NSA) hmangin an hreng mek a ni. FIR hmanga case an siama a lan dan chuan, Sheikh leh helai bawra mi pali-pangnga vel te chuan an bula hna amosque kaltlanga sakhuana thila hun hmang te chu an lo tibuai niin tarlang a ni.

Sheikh a nupui Shakina Begum chuan reporter te hnenah chuan he buaina ah hian an pa chu a inrawh lo niin a sawi, "Hindu leh Muslim te inbeihna a thleng tih hriat a nih khan an buaina chinfel tumin tan a khawh zawk a ni. Keini hi Kolkata bul lawka atanga rawn awm kan ni a, he hmunah hian kum sawm vel chiah kan la awm. Ka pasal hi he buainaah hian a inrawlh lo. An puhna hi dawt a ni," a ti ve thung.

Police lam hian FIR pasarih an dawn tawh atangin mi 25 an man tawh a, heng zingah hian kum tling lo pathum an tel. Police te hian he buaina-a inhnamhnawih mi 27 te chu man tur an neih thu an sawi bawk.