ZALEN November 19, 2023 : Mizoramah mi tang 1,386 awm theihna jail 10 a awm a, hetihlai hian tun dinhmuna tang awm zat chu 2,116 an tling. Central Jail, Aizawl leh Central Women Jail-te chu bituk (capacity) aia tam tang awm tam zualna an ni.

Prison department tar lan danin mi tang 438 awm theihna, Central Jail, Aizawlah tang 977 an awm mek a, an zingah hian dam chhung tang tur (lifer) mipa vek 54 an awm.

Central Women Jail-ah tang 305 awm mek bawkin, he jail hi tang 96 chauh awm theihna a ni.

Mi tang 90 awm theihna, District Jail, Aizawlah tang 168 awm mek bawkin, tang 109 awm theihna District Jail, Lungleiah tang 163 an awm mek a, he jailah hian dam chhung tang tur mipa pakhat a awm.

Tang 105 awm theihna, District Jail, Champhaiah tang 196 an awm mek bawk.

Hengte bakah jail dang - District Jail, Mamit, District Jail Serchhip, District Jail, Lawngtlai, District Jail, Kolasib leh District Jail, Siaha-ah te chuan tang awm thei zat bituk aia tlem jail tang an awm mek thung.