Aizawl February 24, 2024 : Mizorama jail hrang hrang 10-a jail tang awm thei zat tura bituk chu mi 1,386 an nih laiin February 22, 2024 thleng khan tang 2,030 an awm a. Hetihlai hian jail chhungah thil duhawm lo (attemp to suicide etc.) a thlen thin avangin surprise checking nei turin thupek chhuah a ni.

February 2, 2024 khan Inspector General of Prisons chuan thupek chhuahin tun hnaiah jail chhunga thil duhawm lo (attemp to suicide etc.) a thleng leh thin tih report dawn a ni a, hei hi thil serious tak leh thil pawi thui thei tak a ni tih a tar lang.

“Hetiang thil duhawm lo a thlen tawh loh nan leh custodial death kan pumpelh theih nan jail tinah surprise checking regular taka neih thin tur a ni a, jail tangten hmanraw hlauhawm, pawi khawih nana awlsam taka hman mai theih an kawl em tih uluk taka enfiah reng turin kan in ngen,” tiin thupek a chhuahah chuan tar lan a ni.

Hetihlai hian jail tang tamna ber, Central Jail, Aizawlah chuan tang thei zat tura bituk mi 438 a nih laiin tun dinhmunah jail-a tang mek 927 an awm a. Jail tang tlemna ber, Lawngtlai District Jail-ah chuan tang 31 awm mekin he jail-a tang thei zat tura bituk chu 98 an ni.

Mizoramah hian hmeichhe tan bika din jail pakhat - Central Women Jail, Aizawlah awmin, tang 247 an awm mek a. He jail hi mi 96 tan theihna tura ruahman a ni a. Hetihlai hian jail-a awm mek zinga 22 chu an nute an tan avanga jail-a awm ve naupang an ni.

Jail tang mek 2,030 zinga 1,692 chu mipa an ni a, mi 308 chu hmeichhia niin 30 chu naupang an ni a. Jail tang zinga 56 chu dam chhunga tang tura an chungthu relsak an ni tawh.