Jail atangin Sean Kingston a chhuak
![](https://zalen.s3.ap-south-1.amazonaws.com/images/news/1717839983_1.jpg)
Billboard chuan Sean Kingston chu June 5, Nilaini khan jail atangin a chhuak tih an tarlang a, pawisa US Dollar $100,000 pe turin a intiamkam bawk.
Kum 34 mi American singer hi inbum leh rukruk thubuaiah man a ni a, hun eng emaw chen jail-ah a tang a ni. Jail atang hian chhuak tawh mah se a khawsak dan enzui a ni dawn a, a zalen nghal ngawt dawn lo tihna a nih chu. Jail atanga a chhuah hian Instagram-ah "Great to be home" tiin a tarlang a, a thian, chhungkhat laina leh a legal team te chungah lawmthu a sawi - a fan te chungah lawmthu a sawi uar hle bawk.
Associated Press in a tarlan dan chuan Sean Kingston hi May 23 khan man a ni a, amah bakah hian kum 61 mi a nu Janice Turner pawh man tel a ni. Broward County jail-ah dah an ni a, police ten thu an zawhfiah hnuah intiamkamna nen an rawn chhuah leh ta rih a ni. NBC News tarlan dan chuan an nufa hian rukruk leh inbum thubuai siam sak an ni a, an pawikhawih pawh a namai lo hle. Broward County Sheriff leh Davie Police SWAT team ten an chenna in an dapnaah tlereuh thahnem tak an man a, hengte hi dan loa an neih nia tarlan a ni.
NBC chuan nikum October leh kumin March inkarah khan tlereuh chi hrang hrangah US dollar $500,000 hu zet dan loin an nei tih an tarlang. Bank of America atangin $200,000 hu an la a, , Escalade dealer atanga an lak pawh $160,000 hu zet a ni. Heng bakah hian First Republic Bank atangin $100,000 hu leh siam dang lam $86,000 hu vel an la bawk niin an tarlang.
Mizoram-ah pawh rawn concert tawh Jamaican-American singer Sean Kingston hi sum pek kim loh chungchangah company pakhat chuan an khing bawk a, TV leh sound system chungchangah pawisa pe kim duh lohah an puh a ni. He thubuaiah hian February thla khan thiam loh chantir a ni a, a bungraw thenkhat an hren sak bawk.
Kingston hian social media kaltlangin company pakhat hnenah 232-inch Colossal TV leh sound system lei a dil a, a man a pe tla nghal lo thung. Company tan hian Justin Bieber nen advertisement an tihsak tur thu a tiam a, mahse hei hi a tihhlawhtlin loh bakah US dollar 30,000 a pe kim lo bawk nia tarlan a ni cheu bawk.
Sean Kingston hian jail a tan hmain Mizoram leilung a rawn rap hman hlauh a, a lo kal leh tawh pawh beisei lo phawt ang!
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024