ZALEN July 22, 2026: Mizoramah dam chhunga jail tang tur (lifer) mi 49 an awm mek a, July 17, 2026 thleng khan Mizorama jail hrang hrang 10-ah mi tang (prisoner) 1,863 an awm a, awm thei zat (jail capacity) aia mi tang tamna 589 a tling.

Prison department tar lan danin Mizoramah jail 10 awmin chung chu mi 1,526 awm theihna a nih laiin tang awm mek zat chu 1,863 an tling a. Central Jail, Aizawl chu tang tamna ber a ni.

Jail lian ber, Central Jail hi mi 510 awm theihna a nih laiin July 17, 2026 thlenga tang zat chu mi 897 an ni a, tang awm thei zat an pelhna 387 a ni.

Mi tang 96 awm theihna, Central Women Jail, Aizawlah tang 148 an awm mek a. District Jail, Aizawlah tang 82 awmin, tang 90 awm theihna a ni a. Mi tang 109 awm theihna, District Jail, Lunglei-ah tang 116 an awm mek bawk.

District Jail, Siaha-ah tang 49 awmin he jail hi tang 92 awm theihna a ni a. Tang 105 awm theihna, District jail, Champhai-ah 248 awm mek bawkin District Jail, Kolasib, tang 134 awm theihnaah 97 an awm mek.

District Jail, Lawngtlaiah tang 49 awm mekin mi 98 awm theihna a ni a. District Jail, Serchhip, mi tang 128 awm theihnaah tang 94 an awm a, mi tang 96 awm theihna District Jail, Mamit-ah 83 an awm mek bawk.

Prision department tar lan danin tun dinhmunah dam chhung tang tura hrem tawk mi 49 an awm mek a, chung mite chu Central Jail, Aizawl-ah mi 48 tangin, District Jail, Lawngtlaiah mi pakhat tang a awm mek.