ZALEN May 9, 2026 : Mizoram Police Media Cell chuan thuchhuah an siamah Lunglei Jail atanga jail tang te chhuah theihna atana order lem siam kawnga mawhphurtu ber nia lang pahnih eremia Lalthangtura (25) s/o James Lalzawmmawia of Zemabawk, Berawlui veng, Aizawl leh C.Laltlanhlua (31) s/o C. Lalbiaksanga of Republic Vengthlang, Aizawl te chuan tang chhuak te atang hian Rs.4,000 atanga Rs.50,000 thleng an lo laksak thin tih an thuchhuah hian an tarlang.

Mizoram Police Media Cell chuan a hnuaia mi ang hian vawiin hian thuchhuah an siam:-

Lunglei Police Station chuan 27.04.2026 khan R. Lalduhawmi, District & Sessions Judge, Lunglei Judicial District, Lunglei hnen atangin First Information Report (FIR) a dawng a. FIR-a a ziah danin 24.04.2026-a court-a a thut laiin tuna Lunglei District Jail-a UTP Judicial Custody a awm mek mi pahnih Malsawmtluanga leh Dokapthanga te chu an inlan a. Heng mite hian 13.04.2026-a Court of District & Sessions Judge, Lunglei Judicial District lehkha leh 10.04.2026-a Hon’ble Guwahati High Court lehkha, 24.04.2026-a court hearing nei tur leh Rs 50,000 fine-a discharge bond-a an chhuahna tur order an rawn keng a. Mahse heng mi pahnihte hi a hma ni, 23.04.2026-ah ama hnenah ngei court hearing an nei zo chiah a, an hearing neih leh hun tur pawh 08.05.2026 ah fixed a lo ni tawh a ni.

He thil avang hian ringhlelin District Jail, Lunglei-ah thil awmzia chhui chiang tur leh clarification siam turin a kal nghal a. A chhui chianna atangin heng mi pahnih - Malsawmtluanga leh Dokapthanga te mai bakah hian lehkha dik lo hmanga jail tang (convict tawh) chhuah an awm nual nia a lan avangin Lunglei Police Station ah FIR a thehlut ta a ni.

Lunglei Police chuan rang taka hma la nghalin FIR-in a sawi lan mi 15, document dik lo hmanga chhuah tawhte zawn hna hi an thawk nghal a, mi 11 chu man letin District Jail-ah dah let leh nghal an ni a, pakhat lo boral tawhin, Khawzawl Police-in an lo man mek pakhat awm bawkin, mi 13 te chin hriat nghal a ni. Chhui chhunzawm zelna atangin Document lem hmanga chhuah tak te hi mi 17 an lo ni zawk tih hriat a ni a, POCSO case te, ND&PS case leh ruk ruk case a convict tawh te an ni hlawm a ni.

Police in a chhui zelnaah he thila mawhphurtu ber nia lang, Jeremia Lalthangtura (25) s/o James Lalzawmmawia of Zemabawk, Berawlui veng, Aizawl tuna Dictrict Jail Lunglei a UTP a tang mek leh C.Laltlanhlua (31) s/o C. Lalbiaksanga of Republic Vengthlang, Aizawl, tuna Dictrict Jail, Lungleia a nghet lova ambulance driver hna thawk mek te chu an inhnamhnawih ngei nia hriain, 01.05.2026 khan man an ni a, 7.05.2026 khan District Jail, Lunglei-ah dah luh an ni.

Investigation atanga a lan danin Jeremia Lalthangtura hian heng convict mi 17 te hi lo bum kualin an case-ah appeal a siam sak theih thu leh a hmelhriat Ukil a lo biaksak tur thu tiamin pawisa a lo laksak thin a. Tangho hnen atang hian Jeremia hian cheng sangli (Rs.4,000/-) atanga cheng singnga (Rs.50,000/-) thlengin pawisa hi a lo laksak thin a, heng atanga pawisa an hmuh zawng zawng hi Rs.1,35,000/- bawr vel a ni. An pawisa hmuh te hi Jeremia leh C.Laltlanhlua te hian an lo insem thin tih hriat chhuah a ni.

Pawisa hi C. Laltlanhlua kutah emaw a Gpay account-ah a lut thin a. C.Laltlanhlua phone leh banking transaction zawng zawng hi a remtihna thlapin Jeremia Lalthangtura hian Jail chhunga atang hian a hmansak thin a ni.

Document lem te hi Jeremia Lalthangtura hian hmun hnih, Rahsi venga Xerox leh Printing tih theihna Computer dawr pakhat leh District Jail, Lunglei-a office computer-ah te a lo siam thin tih finfiah a ni a. C. Laltlanhlua hian office chahbi te lo dil chhuakin Jeremia-a'n computer a hman lai hian a lo veng thin tih hriat a ni. Heng a document siam chawp te hi C.Laltlanhlua hnenah hlanin C. Laltlanhlua hian Jail thuneitute hnenah a pe thin a ni. Heng document lem siamna atana hman computer leh printer te hi man niin, Forensic Science Laboratory-ah thawn nghal a ni bawk.

Jeremia Lalthangtura hian jail tangte hi bumin an chhuah theihna turin hma a la a, pawisa an chawi hnuah an chhuahna order a lo thlen mai tur thu hrilhin, heng order te hi amahin siam chawpin C. Laltlanhlua hian a lo pui thin a ni. Heng document leh Court order lem te hi Jail thuneitute hnena an thlen hnuah jail thuneitute hian order hmang hian jail tangte an lo chhuah ve mai thin a ni. Heng mi tang 17, document lem hmanga chhuahte hi 30.01.2026 leh 18.03.2026 inkarah Jail atanga chhuah an ni. He case hi Investigation la zawh loh niin chhui chhunzawm mek zel a ni e.