ZALEN October 20, 2024 : Mizoramah dam chhunga jail tang tur (lifer) mi 57 an awm mek a, October 17, 2024 thleng khan Mizorama jail hrang hrang 10-ah mi tang 1,742 an awm a, awm thei zat aia mi tang tamna 356 a tling.

Prison department tar lan danin Mizoramah jail 10 awmin chung chu mi 1,386 awm theihna a nih laiin tang awm mek zat chu 1,742 an tling a. Central Jail, Aizawl chu mi tang tamna ber a ni.

Jail lian ber, Central Jail, Aizawl chu mi tang 438 awm theihna a nih laiin October 17, 2024 thlenga tang awm zat chu mi 792 an tling a, tang awm thei zat an pelhna chu 354 a ni.

Mi tang 191 awm theihna, Central Women Jail, Aizawlah tang 145 an awm mek a. District Jail, Aizawlah tang 141 awmin, tang 90 awm theihna a ni.

Mi tang 109 awm theihna, District Jail, Lungleiah tang 141 an awm mek bawk.

District Jail, Siaha-ah tang 73 awmin, he jail hi tang 92 awm theihna a ni a. Tang 105 awm theihna, District Jail, Champhaiah 137 awm mek bawkin District Jail, Kolasib-ah tang 134 awm theihnaah 104 an awm.

District Jail, Lawngtlaiah tang 29 awm mekin mi 98 awm theihna a ni a. District Jail, Serchhipah mi tang 128 awm theihnaah 78 an awm a, mi tang 96 awm theihna District Jail, Mamit-ah 102 an awm mek bawk.

Tun dinhmuna dam chhunga jail tang tur mi 57-te hi mipa vek an ni a, an zinga mi 56-te chu Central Jail, Aizawla tang an ni, pakhat dang chu District Jail, Lawngtlaia tang a ni.