Aizawl; Heroin vanga Serchhip District Jail-a tang mek mi pathumte chu Zirtawpni khan an tlanchhuak a, he thu buatsaih lai hian zawn mek an ni.

Tang tlanchhuakte hi March 4 zan-a Serchhip leh Thenzawl inkara heroin hawng 5 man kaihhnawiha thubuai nei - David Lalremruata (30) s/o Zothanga, Zokhawthar leh Lalzuimawia (24) s/o Liankhuma (L), Zokhawthar nia insawi ve ve bakah March 5-a New Serchhip Irrigation Complex bula heroin hawng 21 kaihhnawih a man, Lalnunhlima (32) S/o Hrangthankima, New Serchhip Luiralmawi nia insawi te an ni.

Heroin kaihhnawiha man Serchhip District Jail-a tang mek mi palite chu Zirtawpni khan Serchhip District Court-ah hruai an ni a, court-a an inlan zo, jail-a khung leh tura jail kawta motor atanga an chhuk chu an pali hian tlanchhuah an tum a, an zinga mi pakhat chu man hman niin mi dang pathumte chu jail hungna sir lamah tlan liamin man hman an ni ta lo a ni.