Jake Paul chuan MMA legend Anderson Silva hmachhawn turin October thla hian boxing ring a lut leh dawn niin an sawi. An in hnek tur hun tak hi la puan chian a la ni lo thung. Boxer pahnih te sang zawng, rih zawng leh boxing-a an record neih te i han en ho teh ang. 

'The Problem Child' hi feet 6 leh inch 1 a sang a ni a, a inhnek hnuhnung ber chuan 190 pounds (kg 86.18) a rit ni. Paul hian 2020 khan boxing khel ve tan chauhin mi panga a hmachhawn tawh a la hneh vek a, mi pali phei chu a KO a ni. YouTuber boxer a inlet ta hian a fight hnuhnung berah Tyron Woodley a hmachhawn a, round ruknaah a knockout a ni. 

Anderson Silva pawh Jake Paul-a chen chiah a ni a, tlema rit hret zawkin a inhnek hnuhnun berah pound 193.5 a rit a ni. A hmachhawn hnuhnun ber chu Bruno Machado niin an pahnih hian exhibition match an khel a ni. Brazilian hian a hun tha zawng zawng deuhthaw chu MMA khelh nan a hmang a, a hun tawp lamah boxing a luhchilh ve chauh a ni. Tunah hian 3-1 record nei mekin a fight hnuhnung ber chu June thla kha niin Julio Cesar Chavez Jr. a hmachhawn a, split decision hmangin a chak hram. 

Boxing a luhchih hnu hian Paul hi a tluang lutuk lo va, Tommy Fury nena an inhnek thulh a nih hnuah Hasim Rahman Jr nena an inhnek tur a tlawlh leh a, tun tuma Silva nen an inhmachhawn tur erawh a thleng ngeiin a rinawm.

Showtime pay-per-view event October ni 29 a awm turah hian Paul leh Silva te inhnek hi main event tura ngaih a ni.