Jammu & Kashmir Lieutenant Governor Manoj Sinha chuan mi firfiakte nena inzawmna nei nia hriat an nih avangin sorkar hnathawk pali a bân a. An zingah hian Bitta Karate-a nupui leh Syed Salahuddin-a fapa pawh an tel.

Jammu Kashmir Liberation Front firfiak, Farooq Ahmed Dar, Bitta Karate tia an koh bawk nupui, Assbah Arzoomand Khan-i hi 2011 batch Jammu & Kashmir Administrative Service (JKAS) officer a ni a. Salahuddin-a fapa, Muheet Ahmad Bhat hi Kashmir University-a Scientist-D a ni thung.

Anni bakah hin Majid Hussain Qadri, Senior Assistant Professor, Kashmir University leh Syed Abdul Mueed, Manager IT, Jammu & Kashmir Entrepreneurship Development Institute (JKEDI) te chu ram danpui Article 311 tlawhchhanin Lt. Governor hian an hna atangin a ban.

Sorkarin mi firfiakte chhut chimih tuma beihpui a thlakna kal zelah heng mite hi mi firfiakte nen kawng hrang hranga inzawm nia hriat an nih angin chawlhtir an ni.