Thuhma: He Article hi mi mal tu emaw, pawl emaw, Kohhhran emaw, sawi mualpho tumna leh sawisel tumna avanga ziak ka ni lo va. Thudik zawk zawnna ah chhiar tuten min lo pawm sakturin ka ngen hmasa che u a ni. Kan hriat theuh tawh angin mi hausa Robert Arthington’s Own Mission hnuaia Missionaries pahnih Pu Buanga (JH Lorrain) leh Sap Upa (F.W. Savidge) te chuan kum 1894 January ni 11, Ningani khan Sairang thlang changsil kai ah Mizoram leilung an rawn rap tih kan hre theuh a, heng Missionary pahnih te hian ni 16th January, 1894 ah Aizawl McDonald Hills-ah awmhmun an bengbel ta a, Mizo tawng an zir thiam hnuahA, Aw, B, Ch,......Z Alphabet Mizo te awphawi milin min siamsak a, ziak leh chhiar min zirtir a, Krista chanchin tha min hrilh bawk avangin Mizo eng emaw zat te chu Krista ringtuah min siam a, Missionary hna kum li chhung teh meuh Mizote zingah hna an rawn thawk hi a ropui takzet a ni. Tichuan, 1897 khan London lam pan turin Aizawl an chhuahsan leh ta a, Mizote zinga an rawngbawlna leh an hmachhawp zawng zawngte chu Welsh Presbyterian Missionary D.E. Jones (Zosaphluia) te kutah an hlan ta a ni, tih pawh hre thar leh ta ila. Tichuan 1994 January, 11 khan Pu Buanga leh Sap Upa ten Mizo ram leilung an rah hmasak ber ni A kum 100-na Gospel Centenary pawh hlim tak leh ropui takin kohhran hrang hrang ten lungrual takin AR Lammualah kan lawm mup mup a nih kha, Synod phei chuan Gospel Centenary khuangpui lian zet mai, an kaih a, kan vaw ri dup dup anih kha, kan la hriat reng ka beisei. Rev. Dr. Zairema’n khuangpui a vaw ri dup dup rite pawh bengah a la châm reng mai. Tin, Mizoram Sorkar pawhin January11 hi kum tin Missionary Day tiin Holiday-ah a puang nghal bawk a, a va hlu tak em! Mizoten Krista chanchin tha kan dawn theihna tura Pu Buanga leh Sap Upa te pahnih an rawn kal hi sawi bo chi a ni lo, a ropuizia, a hlutzia a taka malsawmna dawngtu Mizo Kristian zawng zawngte chuan Pathian hnenah lawmthusawi tawngtaina bang lovin i nei mawlh mawlh mai zawk ang u. Awle, kumin 2018 Synod Calendar-ah chuan January 11 ni chu (Presbyterian Kohhran din ni) tih leh Missionary day tiin a chuang kawp kulh mai a, Mizoram Sorkar Calendar-ah erawh chuan Missionary Day tih chauhin Holiday-ah a dah a. Chuti lo ni ta sela, Pu Buanga leh Sap Upa te pahnih Mizoram leilung an rah hmasak ber na ni leh thla, kum te nen a in ang chiah chiah em? tih ilo zir chiang ve teh ang aw. Kum 2014 Synod Inkhawmpui Vawi 91-na Mission Vengthlang Prebyterian Kohhran Biakin ah December 9-14 inkar a neih a ni a. Moderator Rev. Lalrinmawia a ni a. 2014 Rorel minute bu Page 58, No. 58 ah chuan Mizoram Prebyterian Kohhran din kum tihchian thu tih thupuiah chuan, (2013 Synod Gen. 1, Sec 250:9, Sec 252:9) nikum 2013 Synod Inkhawmpuiin kan Kohhran din tan kum chungchang Synod Executive Committee zirchiang tura a tih anga an zirchian na an rawn thlen chu kan thlir hova, kan Kohhran din kum chu 1894 January ni 11 a ni, an tih chu a tha e kan ti, tiin 2014 Synod Inkhawmpuiin  a pawm tak avangin 2018 Synod Calendar-ah pawh January11 chu Mizoram Prebyterian Kohhran din ni, tia tarlan a lo ni ta a ni. Le, Mizoramah chuan Prebyterian Kohhran hi members ngah ber kan ni a, Mizoram Prebyterian Kohhran din kum 1894 January ni 11 leh Pu Buanga leh Sap Upa te pahnihin Mizorama chanchin tha hril tura lo kalten Sairang Changsil kai an lo thlen ni chiah nen a inmil thlap mai hi a mak hlein ka hria, a dik ang em? tih hi ka thinlungah a ri tluk tluk mai a, Synod Executive Committee thuchhuah a ni lawi si a, ngun taka SEC-in a zir chian hnu a,  a tha e, ti a an Minute thlap a ni lawi si a. Keimah zawk hian ka hre dik lo zawk nge ka hrethiam lo zawk dikna Patlaah ni 3 chhung zir chianna nen  i’n khai dun teh ang. Robert Arthington’s Owen Mission chuan Missionary Pu Buanga leh Sap Upa pahnih techu hmun dangah an transfer tak a vangin Mizorama missionary hna an hmachhawp thawk chhunzawm tur in Wales Presbyterian Missionary D.E. Jones (Zosaphluia) te kutah 1897 August thla khan an hlan a, missionary D.E Jones (Zosaphluia) pawh a lawm hle a ni. Hetih hunlai hian  Mizoram-ah Presbyterian kohhran ala ding lo va, amaherawhchu missionary D.E Jones leh a thawhpui Rai Bhajura te chu thingpui huan tlang atangin tun a Mission Veng Synod Executive Secretary (Sr) Bangla (Banglapui) hmunah hian an rawn in sawn a, D.E. Jones te in kawt zawla in pakhat Rap In chu Missionary D.E. Jone-a kum 28th Birthday (piancham) denchhenin sikul a tan te, Biak In atan te leh tawngtaina atan te  Sunday School atan te, 15th February, 1898 sunday khan amah in ahawng a, hemi ni atang hian missionary D.E Jones te hian eng kohhran mah ala din loh avangin sunday apiangin Pathian biak inkhawm nan te, Pathian thusawi nan te, tawngtai nan te an hmang thin a ni. He Rap Inah hian kha tih laia Lushai (mizo) hnam Pu Buanga te zirtirnaa ringtharte pawh khan Pu D.E Jones te nen an inkhawmho thin a ni tih a hriat theih. He Rap In hi Church Service neih nan an hman thin avangin mission veng Presbyterian kohhran chuan an kohhran din tan ni leh thla te kum te thlengin zir chiang tur commitee a dinte chu ni 6.5.1997 khan an thu a, ngun takin an ngaihtuah a, an zirchiang a, a chunga kan tarlan tak Wales Presbyterian missionary DE Jones-a (Zosaphluia) vawi 28-na birthday denchhen a an hawn tak rap in hawnni ni 15 Feb, 1898 hi mission veng presbyterian kohhran din ni ah anpawm tak avangin Mission Veng Presbyterian Kohhran chuan ni 15 Feb 1998 khan ropui takin an kum 100 tlin Centenary pawh an lawm a nih kha kan la hre reng ang chu maw. Hetiang a nih avang hian kei pawhin mission veng Presbyterian Kohhran din kum behchhanin 1998-100=1898 Feb ni 15 hi Mizoram Presbyterian Kohhran din tan kum a ni zawk awm e tih hi a tha e ka ti ve ta a ni. 2013 SEC zir chianna nen chuan kum 4 velin a inthlau a ni. 2013 SEC zirrchianna leh ka zirchianna bak pawh chhui tur neite chuan zau takin chhui ila, 1894 hnu a piang vek kan ni a, ka zirchianna pawh a dik ber e ka ti bik lo, thudik patlaah i khai chhin ang u. Mizoram Prebyterian Kohhran din kum zir chiang tura Synod inkhawmpuiin a ruat 2013 SEC puipate (2013 Synod Bu) 1. Moderator : Rev. K. Lalhmuchhuaka.2. Secretaries: a) Rev. H.Lalrinmawia (Sr.),b) Upa H.Zoliana (Jr.).3. Finance Officer: a) Rev. Lalzuithanga,b) Rev. Dr. R.Lalbiakmawia4. Statistician: Rev. K. Lalthangmawia.