DOWNLOAD OUR APP

Read latest news on your phone
app-store
JAPAN LIRNGHING: Darkar 72 hnuah pitar kum 80 chuang chhanchhuak
Jan 04, 2024

Kum thar nia lirnghing na takin a sawi atanga darkar 72 zet a liam hnuah pitar kum 80 chuang mi chu Ningani khan a chenna in chim kar atanga lak chhuak a ni.


Sorkar news agency, NHK-in video a tihchhuahah pitar hi an khua, Wajima-a a in chim tlusawp kar atanga lak chhuah a ni tih a lang.


Chhanchhuah hna thawktute chuan dama la lak chhuah tur an awm beiseina an nei tlem ta hle a, ni thum inzawn hun an hawn pawh a tawp tawh.


Thawhtannia hmun kilkhawr lai, Noto peninsula-a magnitude 7.6-a na lirnghing avang hian mi 82 vel thi an awm tawh.


Mi tam tak in chim tlusawp karah an tan rin a ni a, a tam ber hi Suzu leh Wajima khuaah a ni.


Pitar kum 80 chuang lak chhuah tak hi lir a nghing atang khan a in chhawng hnuai berah a lo tang ngar ngar a ni.


Thawhtanni tlai dar 4:10-a lir a nghin atanga darkar 72 a liam tawh avangin mi zawn hna chu tihtawp a ni tawh a ni.


Mi sang tam tak tui leh power nei lovin an la awm mek a, lei min leh kawngpui kaltlang theih loh a la tam avangin mi tam tak tlawhpawh theih loh an la awm bawk.


Japan Prime Minister Fumio Kishida chuan Ningani zingah khan mi 150 chhanchhuah an ni tawh tih a sawi a, chhanchhuah hna thawktuten theihtawp chhuahin an bei zui zel dawn tih a sawi bawk.


Thawhtanni lirnghing leh a hnu lama sawi zui thlengah hian mi 330 vel hliam tuar an awm bawk niin AFP news agency chuan a tar lang.


Lir a nghinna hmuna cheng mi 30,000 vel zet chu tawm hulna tur siamah an la khawsa zui reng a, khaw eng emaw zat chuan tui, electric leh internet an nei lo.


Hetih lai hian online-a thu leh video darhah beisei loh tak taka mi chhanchhuah vawrh darh a ni hlawm a. Tlawmngai pawl, Peace Winds Japan-in video a thehdarhah chuan chhanchhuah hna thawktuten in chim tlusawp karah, bungraw chhia an hai fai hrep hnua pitar lak chhuah lai pawh an lang a, blanket chhah takin an tuam nghal bawk.


Japan-ah hian kum 1981 khan lirnghinga him tur in sak dan ruahman a ni a; mahse, he dan siam hma hian thing in sak tam tak a awm tawh a, a la ding teuh bawk.


Wajima-a cheng, a tam ber kum upa lam ni tawhte pawhin an inte hi an chei that mang lo va. Kum 2018-a chhinchhiah dan chuan an khuaa in ding zinga a zahve aia tam chu inkaihhruaina thar anga sak a la ni lo.


Mi 23,000 chuang chenna, Wajima hi tunah chuan khaw rauhsan ang a ni rih mek a, lir a nghin hnu lawkah khan tsunami thleng thei tia vaukhanna avangin an chhuahsan vek a ni.


Thi an tam berna khua pawh niin mi 48 an thi a. Thi zat hi an pun ngei rin a ni a, an khaw chhehvela khaw tenau zawkte chu lei min vangin an la thleng thei rih lo mai mai a ni.


Wajima Mayor Shigeru Sakaguchi chuan ei tur leh puihna dang pawh hmun hima insuan chhuak 10,000 zinga 2,000 vel chauhvin an la dawng niin a sawi.


Mi 13,000 chuang chenna, Suzu mayor pawhin an khuaa in zawng zawng deuhthaw a chim niin a sawi a. 90% vel zet chhe vek leh chhe nasa an nih thu Masuhiro Izumiya chuan a sawi.


Tsunami tenau deuhvin lir a nghin hnu minute khatah he khua hi a nuai bawk.


Japan hi khawvela lirnghin duhna ram ber zinga mi a ni a, Noto velah hian kum 2020 atang khan a tam zual a. Kum thum liam ta chhungin a tenau leh a na deuh hlek vawi 500 chuangin a sawi a ni.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh