Aizawl: Thosi seh vanga natna thluak khawih thei Japanese Encephalitis (JE)  vei hmuh chhuah an la awm lova;  Aizawl Civil Hospital ah JE hmuh chhuahna kháwl leh thawktu dah fel a ni tawh niin Zalen chuan thu a dawng. Health and Family Welfare hotute hnen atanga thudawn danin Manipur State-a leng mek nia sawi  Japanese Encephalitis natna chuan kian lam a pan hret nia hriat a ni a. Japanese Encephalitis (JE) lakah mipui te an him theih nan Health Department chuan nasa taka hma la in Aizawl Civil Hospital ah JE hmuhchhuahna kháwl leh thawktu dah fel tawh a ni. Thluak khawih zawnga thawk Japanese Encephalitis hi Mizoram state thenawm Manipur ah a leng nia sawi niin he natna avangin nunna chan an awm tawh a, damdawiin ah pawh mi engemaw zat dah an lo ni tawh a ni. Hetih lai hian thudawn danin tunhnaia Manipur ramri depa JE zirchiang tura Mizoram atanga expert group kalte pawh Aizawl ah lo kir leh tawh a, expert group te hian ramri dep ah hian Japanese Encephalitis pai thei thosi chi ang hi an hmu ngei tih an sawi. Health department hotute chuan ramri dep ah hian JE pai thei thosi chi ang hi hmuh ni mahse heng thosi te hian he natna hi an la pai lo nia hriat a nih thu Zalen palai an hrilh. Ramri depa khaw hrang hrang ah hian Japanese Encephalitis natna a tai darh thulhah inven dan tur len inenkawl dan turte khawtlang mipui ah zirtirna pek an nih hlawh tawh thu Health department hotute chuan Zalen palai hnen ah an sawi bawk a ni.