ZALEN Sepetember 3, 2025: September ni 1, 2025 khan Joint Civil Society of Mizoram (JCM) a tel pawl hrang hrang leh mimal sawm bik te chuan the Forest Conservation Amendment Act (FCAA) 2023 chu zirchianna hun an hmang a. FCAA 2023 hi Mizoram Assembly-in August ni 27, 2025 khan a pawm a, JCM chuan he a pawmna hi ngaihtuah nawn leh turin an ti.

JCM-a tel - Mizoram Transformation Movement (MTM), Center for Environment & Social Justice (CESJ), Mizoram First (MF), Citizen Alliance for Truth and Social Justice (CATAJ) leh Mizoram Environment NGO Coordination Committee, CSO te chuan FCAA 2023 hi hmasawnna atan a pawimawhna awm mah se, Mizoram leh a chhunga cheng zawng zawngte tan a him lo hle in an hria a, chuvangin FCAA 2023 pawmna resolution Mizoram Assembly in a pass tawh chu hnuk kir turin Special Assembly ko turin ram hruaitute leh sawrkar an ngen a ni.

JCM chuan he resolution pawm/adopt tak hi hmanhmawh taka pass, MLA tam ber te pawhin an zirchian hman loh leh mipuite leh NGO te phei chuan an ngaihdan pawh an sawi ve hman lohva hetiang resolution pawimawh hi pass chu pawi an ti a, hemi avang pawh hian sawihona tha zawk neih a nih theihna turin Special Assembly hi koh leh ngei a tulin an hria a ni. FCAA 2023 chungchang tho hi Nagaland Assembly in a lo ngaihtuah tawh a, mipui leh a ngaihventute ngaihdan pawh an la a, sawihona tha tak an neih hnuah Nagaland chuan an pass ta lo a ni, an ti.

FCAA 2023 hi Mizoram State tan leh Autonomous District Council zawng zawngte tan pawh a himlo tih a lanna thenkhatte chu :

1. International Border (ramri) atanga 100 km (Mizoram pum) ah Central sawrkarin ram tana pawimawh a tih ah hma a la thei dawn a, heath hian Forest Clearance pawh a ngai lo a ni.

(no 4.2.(c): as is situated within a distance of one hundred kilometres along international borders or Line of Control or Line of Actual Control, as the case may be, proposed to be used for construction of strategic linear project of national importance and concerning national security) 

2. He dan hmang hian Mizoram chhungah leilung hausakna zawn leh laih chhuah te awlsam takin Central sawrkar in a duh danin a tih theih tawh dawn. Tunah hian Mizoram chhungah Rare Earth minerals zawn tum mek a ni.

(no 5.b. 2: The Central Government may, by order, specify the terms and conditions subject to which any survey, such as, reconnaissance, prospecting, investigation or exploration including seismic survey, shall not be treated as non-forest purpose.")

3. Sawrkar kher lo pawh, entirnan; Company/MNC/Corporate-te pawhin hetiang thil hi an rawn tih theih dawn avang leh central sawrkarin a duh apiang a ti thei ang tih a inziah avangte in a him lo kan ti takzet a, kan ram neih chhun a kan thuneihna hi Central kutah nasa takin kan pe tihna a niin a lang a ni.

(5.a.II (vi) establishment of zoo and safaris referred to in the Wild Life (Protection) Act, 1972, owned by the Government or any authority, in forest areas other than protected areas)

4. Tin, he dan ah hian Central Government in a duh duh a rawn ti thei tihna a ni. 

("5 (a) (viii): Any other purpose which the Central Governement may , by order, specify").

5. He dan hlawhtlin theih nan hian central sawrkar in thuneihna a in pe sang hle a, State sawrkar pawh a duh angin a duh hunah thu a pe thei ang a ti a ni.

(No 6(3C): The Central Government may, from time tot ime, issue such directions, to any authority under the Central Government, State Government or Union territory Administration, or to any organisation, entity or body recognised by the Central Government, State Government or Union territory Administration, as may be necessary for the implementation of this Act.".)

Article 371G-in Mizoram hi Parliament-in dan a siam atang pawhin min humhim a. Amaherawhchu he FCAA 2023 hi kan ram Assembly in a 'adopt' tak avangin he Dan siam hi Mizoramah hman theih a ni tihna a ni. Chuti a nih chuan kan ramah ram dang mi te pawhin ram rawn neiin central sawrkar pawh duh duhin an che thei dawn tihna a ni a, Article 371G-in min humhimna hi 'phalna' kan pek tawh miau avangin nasa takin a tlem dawn a ni.

Mizoram hian hmasawnna hi kan mamawh em em a ni tih kan hria a, heng hmasawnna te hi awmze nei, kan ram tichhe lo zawngin a kalpui theih a. Hmasawnna tam tak te a thuanawp thin na chhan chu Forest Clearance te la lovin hnathawh kan tum thin vang a ni fo a ni. He FCAA 2023 adopt lo hian Mizoram hmasawnna hi dan angin a kal thei reng a, chuvangin kan ram humhimna leh hmasawnna a kal kawp thei reng a ni.

Joint Civil Society of Mizoram leh a thawhpuite chuan Forest Conservation Amendment Act 2023, Mizoram Assembly in a pawmpui hi ngaihtuah nawn leh turin sawrkar an ngen a ni.