ZALEN March 17, 2026: Joint Civil Society of Mizoram (JCM) chuan nikum lamah kawng chhiat avanga harsatna thlenna hmun, Sairang leh Kawnpui inkar kawng siam mek chu vawiin hian a hmunah kalin an enpui a. Kolasib JAC hruaitute nen Kawnpui ah joint meeting neiin Mizoram kawng chungchang an sawiho a, a hnuaia tarlan ang hian thuchhuah an siam a ni. 

1. Sairang leh Kawnpui kawngah hian Buchali leh Sairang inkar bikah hian fur ruahtui tlak hma a siam ngei ngai a la awm nual a. Tun thlengin ruahtui tlak hlek hnuah pawh dil ang mai a tui tling a la awm a, Sairang atanga Sihhmui peng pawh motor lian kal hlei theih loh leh truck tang khawpa a chhiat avangin rang takin NHIDCL-in an siam nghal kan phut a ni. 

2. Mizoram-a National Highway tam ber te hi NHIDCL hnuaiah a awm avangin an hnathawh that leh that loh endik tu tur Monitoring team hi an awm lova, anmahni an in monitor mai hi tha kan ti lo a ni. Chuvangin Mizoram sawrkar hian kan thenawm sawrkarin an tih angin 3rd Party Monitoring Team din turin kan ngen a, Sawrkarin a ti lo a nih chuan district hrang hranga mi thahnemngaite leh thalaite intelkhawma Monitoring Team indin mai a tulin kan hria a ni. 

3. Mizoram dung leh vangah kawngpui chhia avangin nikum lamah harsatna tam tak a thleng a. Tunah hian Mamit kawng te, Tuidam kawng te, Lungleng kawng te leh khaw dang tam tak kawng te fur ruahtui tlak leh hma ngeia siam ngei turin Mizoram Sawrkar kan ngen a ni.

4. National Highway 06/306, Vairengte atanga Sairang pawh hi hmun tam takah fur ruahtui thla khat pawh tuar zo lo tur a awmin kan hria a, Chuvangin Sawrkarin hnathawh theihna hun tlem kan la neih lai hian kan kawngpui pawimawh hrang hrangte hi thapui thawhin, a tlai hmaa theihtawp chhuaha hma la ngei turin kan ngenin kan beisei tlat bawk a ni.