Jeje-a hovin V-Day pual thisen pek rûnpui nei

ZALEN February 15, 2026: Mizorama Valentine’s Day-a puala thisen pek rûnpui neih thin chu nimin February 14 khan Aizawl leh district khawpui dang thenkhatah huaihawt leh a ni a. Kumina V-Day puala thisen pek rûnpui huaihawtna pui ber chu Dawrpui Multipurpose Hall-ah neih a ni.

ZMCH Blood Bank-ah leh district dang thenkhata district hospital-ahte pawh huaihawt a ni a. Dawrpui Multipurpose Hall-a V-Day Blood Donation Camp-ah hian chawhma dar 10:30 atangin thisen pek tan a ni a. Chawhnu dar 1-ah function tawi tê hman a ni a, MLA Jeje Lalpekhlua chu khuallian a ni.

Jeje-a chuan, "Thisen petute zanwg zawng zahna chibai ka buk. Mizote hi tlawmngai hnam kan nih a, kan tlawmmgaihna avang hian kawng engkimah Mizo nih a nuam thin. Thisen pek hi tlawmngaihna lan chhuahtirna remchang tak a ni. Thisen pek hi a hlauhawm lo a, kei pawhin ka pe ve thin a, harsatna ka la tawh phah ngai lo," a ti.

South Tuipui bialtu MLA chuan, "Mizo zingah thisen vawi tam tak pe tawh mi thahnem tak an awm a, chungte chu tuna thalaite hian entawn ila, mi dangte tan malsawmna ni a, mi nunna chhan turin thisen pek i uar zel ang u. Thisen pe turin hrisel that a ngai a, hrisel turin ei leh inah fimkhur ila, kan taksa i vawng uluk theuh ang u," tiin thalaite a sawm.

V-Day puala thisen pek hi kum 2010 khan Zikpuii Pachuau (tuna AMC Corporator ni mek) hmalaknain “Blood for your Valentine” tih thupuia hmangin neih tan a ni a, kum 2012 atangin Zikpuii leh AVBD-ten a huhoin an buatsaih a, 2013 atangin AVBD-in a kutken tan a, AVBD mai ni loin MSACS nen thawk hoin district dangah te pawh tih tan a ni a, thupui atan ‘Show Love, Give Blood’ tih hman tan a ni.

Kumina V-Day Blood Donation Camp hi AVBD, MSACS, NHM leh blood bank tangrualin an huaihawt a ni a, a vawi 17-na a ni a. Mizoramah 2010-2025 chhung khan V-Day pualin thisen unit 11,621 pek a ni.

Nimina V-Day puala thisen pe apiangte hi tunlaia thalaite lawm -Frankie Khiangte, Mizo Film Award hnuhnung bera Best Actress dawngtu Rosy Lalramthlengi, filmstar leh zaithiam Vanlallawmawmi te an ni.

Mizoram hi V-Day puala thisen pek rûnpui huaihawt hmasa ber niin hriat a ni a; India ramah chuan a hmasa ber ni ngeia hriat a ni.

V-Day pual thisen pek zat (unit)

2010 - 146

2011 - 350

2012 - 425

2013 - 757

2014 - 940

2015 - 750

2016 - 415

2017 - 511

2018 - 1,012

2019 - 905