ZALEN June 6, 2026: South Tuipui bialtu MLA Jeje Lalpekhlua chuan Hnahthial Bazar Veng-ah Upa te inkawm hlimna atana In a luah sak a, MUP Run tia a hming an sak, Mizo Upa Pawl : Sub-Headquarters, Hnahthial Office ni bawk hi nimin khan Lok Sabha MP Richard Vanlalhmangaiha chuan a hawng.

He Run-ah hian office bungrua chi hrang hrang bakah upate tana infiamna tur hmanrua chi hrang hrang a dah sak bawk a, kum lama Upa ten an hlut nghal hle a, he hmun hi nitin an inkawm hlim theihna tur atana duan a ni.

Richard Vanlalhmangaiha chuan Hnahthialin Upa ngaihsak thiam MLA tha tak an nei chu a lawmpui thu a sawi a. Upate'n inkawmhlim paha an ngaih pawimawh zualte sawihona hmun tur an nei ve ta chu a lawmpui takzet thu sawiin Sawrkar Laipui pawhin Upate chu a ngaih pawimawh thu a sawi a. MP hian Office hawn thar lawmpui nan MUP hnenah ₹3000 a hlan nghal a ni. 

Jeje Lalpekhlua chuan MUP chu a ngaihpawimawh thu sawiin, mi in luah ngai lova anmahni puala building a la hmuhsak thei lo chu pawi a tih thu sawi a. Mahni hriselnate ngai pawimawh turin a chah. 

MUP Office hawn thar hi Bazar Veng, C. Lalfakzuala building chung zawk niin luah man hi MLA Fund atanga pek a ni dawn a. Hei bakah hian upate intihhlimna tur - TV, Carrom Board leh thil dang dangte MLA hian hlan nghalin WiFi, Tui leh Gas connection-te pawh tih fel nghal vek a ni bawk.