India rama chanchinbu lian ber zinga mi, Times of India chuan an website-ah ‘Mizoram Health Minister R Lalthangliana'n South Tuipui bialah ZPM candidate Jeje Lalpekhlua a hneh lo’ tiin an ziak kuau a. Ni e, vawi tam tak India lo tihmingtha tawh, Hnahthial pa hian 2023 Mizoram Assembly Election-ah hnehna changin MLA a ni dawn ta a, amah pawh a lawm a, lawmpuitu pawh a ngah hle.

November 7-a mipuiten vote an thlak chu Thawhtanni khan chhiar niin Jeje-a hian vote 5,468 hmuin amah hnaih bertu, health minister leh MNF pa lian ber zinga mi, Dr. Thangtea chuan vote 5,333 a hmu ve thung.

Kum 32 mi, Jeje-a hi a inkhelh ve laia khelmuala hun a lo hmanpui tawh tam tak leh a hnung zuia India leh Mizoram tihmingthatu infiam mi bakah mi lar (celebrity) tam takin an lawmpui thu social media-ah an tar lang hlawm.

India rama football league sang ber, Indian Super League (ISL)-a Indian player zinga goal thun tam ber dawttu leh Chennaiyin FC tana goal thun tam ber nihna la chelh ngar ngartu, Jeje-a chuan a Insagram account-ah lawm thu sawina a tichhuak.

Thlalak (flyer) hmanga lawmthu sawina a tihchhuahah hian India striker hlui chuan, “South Tuipui mipuite, kan bial enkawl tura min ringtawka MLA atana min thlan tlin avangin thinlung takin in chungah lawm thu ka sawi e,” a ti a.

Mizoram chhung bakah ram pawn atanga amah duhsaktute chungah pawh a lawm thu sawiin, “Ka lawmna pui ber erawh malsawmtu Pathian a ni,” a ti a. A flyer dah chhuah caption-ah hian Bible chang lar tak, Sam 37:5 tih a dah tel bawk.

India rama mi mala footballer chawimawina sang ber, AIFF Men’s Player of the Year Award leh FPAI Indian Player of the Year atana thlan lo ni tawh, Jeje-a hi lawmpuitu an tam hle a. Lawmpuitu thenkhatte chu a Instagram-ah hian story hmangin a tar lang nual bawk.

Heng zingah hian Chennaiyin-a a khelhpui thin Zohmingliana Ralte te, zaithiam Isa Pachuau te, I-League-a Mohammedan tana khel mek Malsawmzuala te, ISL-a Punjab FC defender Lalchhuanmawia te, Odisha FC atangin midfielder Lalthathanga Khawlhring (Puitea), Isaac Vanmalsawma, goalkeeper Lalthuammawia Ralte, winger Jerry Mawihmingthanga, Isak Vanlalruatfela leh defender Laldinliana Renthlei te, model hriat hlawh Nunui Sailo te, I-League-a Inter Kashi left back Lalruatthara te, boxer NT Lalbiakkima te, Aizawl FC defender Joe Zoherliana te leh forword Laldanmawia Ralte te leh East Bengal attacking midfielder thin Lalrindika Ralte te pawh an tel.

Social media account-a Jeje-a lawmpuina tar langtu eng emaw zat hian amah nena thla an lak dunna an tar lang tel nual bawk.