India rama footballer sang tam tak zingah Mizo tlangval, Lallianzuala Chhangte chu 2022-23 chhung atan a thiam berah thlan a ni a. Thawhlehnia puan, All India Football Federation (AIFF) Senior Men’s Player of the Year chawimawina dawn hi a phu a, a lawmpui tak zet tih Mizo footballer ropui ber zinga mi, Jeje Lalpekhlua chuan a sawi.

Jeje-a’n a hnungzuitu a fak
Hnahthial tlangval, India ram tana goal 23 lai thuntu, Jeje-a chuan a sulhnu chhui mektu, Lza chu a lawmpui tak zet tih ZALEN-in a biaknaah a sawi a, “Mizoram atanga dawn hi chu a lawmawm bik a, Mizoram leh Mizo hnam aiawha a ni bik,” tiin a sawi a, a phu tak zet bawk tih a sawi.

“AIFF Player of the Year phei hi chu a hlu a, India ram pum footballler sang tam tak zinga tha ber tihna a ni a, a hlu zual bik em em a, thangthar zelte tan pawh chona thar a ni tel bawk,” tiin a sawi.

Jeje-a hi Mizo footballer zinga AIFF Men’s Footballer of the Year dawng hmasa ber a lo ni tawh a, 2015–16 season khan Chennaiyin tan a khelh laiin a lo dawng tawh a ni.

Mizo sports writer-ten an lawmpui
Mizorama chanchinbua infiamna (sports) ziaktute pawhin Lza hi an lawmpui a, season liam taa a chet dan thlirin a phu hle niin an ngai.

Sports writer hlun ber pakhat leh tun thlenga la ziak zinga ziak rei tawh ber, Hmingsanga chuan a lawmpui tak zet sawiin, “Indian football-ah Lianzuala hi lo lian zual zel rawh se!” a ti.

Mizorama chanchinbu darh zau ber, Vanglainia ziaktu, Lalzarzova chuan, “A thawhrimna leh tumruhna bakah Pathian a tih vangin India ram player tha berah thlan a ni a, a khelh dan leh a record thlirin a phu a ni. Lianzuala ka lawmpui a, India ram leh Mizoram tihmingtha zel turin duhsakna ka hlan,” a ti ve bawk.

Mi thawkrim Lza
Mumbai City winger Lza hi a chanchin sawi leh ziaktu reng rengin an tihlan tel ziah pakhat chu a thawhrimna, a tumruhna leh a beih hram hram zelna hi a ni.

Zara chuan, “Lianzuala hi India ram chu sawi loh, Mizo zingah pawh ani aia talent nei tha sawi tur thahnem tak an awm ang; mahse, ani aia thawkrim leh tumruh erawh sawi tur an vang pharh,” a ti a. “AIFF Player of the Year 2024 a ni ringawt lo a, football khela ei zawng turte tan ‘IDOL’ nih a tling,” a ti.

Indian striker hlui, Jeje-a pawhin Indian winger thawhrimna fakin, “He chawimawina dawng tur hian a phena thil awm hi kan hriatsak a ngai a, Zuala pawh a thawkrim em em a, a inpumpekna, a beihna, mi tih loh lai pawha a tih tang tangna rah a ni a, hengte hi kan hmuh ve loh, a phena mi niin a phu em em a ni,” a ti bawk.

Hmingsanga pawhin, “Lallianzuala Chhangte hi mi taima leh tumruh a ni a. A taimakna leh inpekna hian hlawhtlinna a hlawhchhuak tam hle,” tiin a fak ve bawk.

2022-23-a Lza sulhnu
Mizoram Premier League Season 3 play off-a Lunglei FC tana rawlthar mai a nih laia a inlan atanga Mizoram football khawvela hriat tan, Lza hi season hman zawh chiahah a che tha a, tuna India rama player tha bera thlan a ni hi a chet dan enin a phu tak zet.

Mumbai City leh ram tan inelna hrang hrang vawi 45 a inlan a, goal 20 thunin a thiante thun tur vawi 10 a siamsak bawk.

Team tan Hero Indian Super League (ISL) Shield a pet chhuak a. India ram tan Hero Intercontinental Cup hlawh chhuakin final-a Lebanon an hneh tumin Player of the Match atan thlan a ni nghe nghe.

Hero ISL-ah hian player tha ber nihna tho hauhvin Golden Ball a dawng a, Durand Cup-ah pawh hetiang tho hi a dawng a. Tun hnaiah Footballer Players Association of India (FPAI) Indian Player of the Year atan thlan a ni zui a, tunah a aia hlu, AIFF Player of the Year atan thlan a ni leh ta bawk a ni.

AIFF Award hi
AIFF Player of the Year Awards hi kum tin footballer tha ber an thlan hnena AIFF-in a pek thin a ni a. Men’s Player of the Year hi kum 1992 atanga a pek tan niin I. M. Vijayan chu a dawng hmasa ber a ni a, Lza’n India tana a khelhpui, Sunil Chhetri chu vawi sarih dawng tawhin dawng tam ber a ni.

Women’s Player of the Year Award hi kum 2001 atanga pek tan a ni a. Kum 2013 khan mipa tan AIFF Emerging Player of the Year Award pek tan a ni a, hmeichhe tan kum 2015 khan pek tan a ni bawk.

Chawimawina dawng tur hi kum 2016 thleng khan mipa bik hi I-League club-a coach-te thlan chhuah thin a ni a. Kum 2017 atang erawh kha chuan I-League leh ISL-a coach-ten thlang tanin hmeichhe lam hi women’s national team coach-in AIFF Technical Director nena inrawnin a dawng tur an thlang thin thung.

Kuminah hian mipa lamah Mizo tlangval thlan a nih rual hian Manisha Kalyan chu Senior Women’s Player of the Year atan thlan niin ani hi nikum khan Cyprus club Apollon zawmin UEFA Women’s Champions League-ah pawh a inlan phak hial a ni.

Men’s Emerging Player of the Year atan Mumbai City-a Lza’n season thara a khelhpui tur, Akash Mishra chu thlan niin season liam taa Hyderabad FC leh India team tana a chet that vanga thlan a ni a. Hmeichhiaah Shilji Shaji chu thlan a ni ve thung.