March 27, 2023; Mizo footballer zinga ropui ber pawl Jeje Lalpekhlua chuan tukin khan a pianna khua, Hnahthial model veng ah ZPM membership a pe.

Vawiin a Lunglei Municipal Council (LMC) inthlan campaign kharna ZPM in an buatsaih ah thusawiin Jeje Lalpekhlua chuan, India hmarchhak zingah Mizoram dinhmun a hniam bik hle a a hriat thu te, hruaitu thlan kawngah rilru fim tak pu a, sum leh pai therhlo te hnawl ngam a, kan ram leh hnam thatna tura vote thlak turin Lunglei mipuite a sawm.

"Mahni pumpui hmangaih lo, kan ram leh hnam hmangaihtu midik hi kan en thiam a ngai tawh," tiin, "Inkhelh ka chawlhsan a, hahdam taka chhungkua awmkhawm te pawh ka chak a, Pathian ka rawn nasa, mahse helai a ding ve  turin Pathian in min ruat ve niin ka hria," a ti.

"Mi rethei leh hausa inkar hlat zia te, hna zawn chungchangah ah pawh hmelhriat nei lo tan a a harsat zia te kan hria," ti bawkin, Jeje Lalpekhlua chuan, a tihtheih ve tawk, mirethei tan a din ve a, mipuite tan a pen chhuah ve a duh thu te a sawi.

"Mi tam tak beidawng, mi harsa leh tanpui ngai an tam a, chungte chuan min nawrkal ve in ka hria, politics hi ka luhna atana kan duh ngai loh a ni. Inchirhthehna te nasa mahse, chutiang hria leh huam chungin, miretheite tan leh kan ram tan ka rawn penchhuak ve a ni," a ti bawk.

Thu chiang la awm lo mahse, Jeje Lalpekhlua hi South Tuipui bialah ZPM ticket in MLA candidate a nih rin a ni.