ZALEN, Nov. 5, 2024: Mizo ritchawi chak hriat hlawh ber, Jeremy Lalrinnunga chu hun eng emaw chen a dara hliam a lo neih tawh chu Inrinni khan zaisak a ni a, thla khat leh a chanve vel tal a chawlh rih a ngai dawn.

Kum 22 mi, Jeremy-a hi Mumbai-ah a chhungrila hmun thuma a dar thler hi zai a ni a, tunah chuan damdawi in chhuahsan leh tawhin a awmhmun nghet zawk, Pune-ah a u-in a awmpui mek.

2018 Buenos Aires Youth Olympic Games-a India tana kg 62 huanga gold medal latu, Jeremy-a hi Inrinniah hian awm hahdam turin Aizawlah a haw dawn a, chawlhkar ruk (thla khat leh a chanve vel) tal a chawlh a ngai dawn tih a pain ZALEN a hrilh.

Jeremy-a hi October thla khan National Championship Senior-ah pawh inlanin Services tan kg 67 huangah bronze medal a la a; mahse, he mi hnua Mumbai-a an endiknaah CT Scan hmangin a dar thler chu rin aiin a thukin a nasa tawh tih hmuh chhuah niin zai zui a ni ta a ni.

Ainawn Veng tlangval, Jeremy-a hi Argentina khawpuia Youth Olympic Games-a India a chawimawi hnu, kum 2022 khan a aia ngaihhlut zawk, Birmingham-a Commonwealth Games-ah kg 67 huangah gold medal la lehin India tihmingthatu a ni leh bawk.

A dar hi Birmingham-a inelna neih lai pawh khan a lo sawisel tan tawh a. Zai lova inenkawlin training leh inelna hmachhawn nei zeuh zeuh mah se a lo thuk deuh tawh avangin zai a ni ta a ni.

(Thlalak hi an zai hma nia damdawi in khuma a awm lai a ni)