Mizote tana rit chawia Commonwealth Games champion hial lo chher chhuak tawhtu, Army Sports Institute (ASI) chuan Mizo dang a enkawl mekte zuitu turin lifter pathum a thlang leh ta a, Ningani hian an hmun an pan ang.

Pune, Maharashtra-a infiamna lama sipai inzirna hmunpuia chher turte hi August 10-11 chhunga Mizoram Weightlifting Association (MWLA)-in 4th Youth (Boys & Girls), 13th Junior leh 18th Senior Men & Women Mizoram State Level Weightlifting Championships a buatsaiha Mizo naupang chher tlak thlithlaia ASI atanga kalten an thlan chhuahte an ni.

MWLA-in inelna a buatsaih hi ASI atang hian Lt. Col Nikhil Singh, weightlifting incharge leh M. Syamlal, weightlifting coach ten chhimin an hmunpuia seng luha chher zui tlakte an dap a ni.

Tun tuma an thlan chhuahte hi Mizoram State Sports Council (MSSC) hnuaia weighttlifting academy-a awm mekte an ni a. David Lalzawmdika (96 kg), Sialhawk; Isak Malsawmtluanga (55 kg), Ramhlun Vengthar leh Laithanpuia (55 kg), Sairang Dinthar te an ni.

Pune-a inzira awm tur lifter-te hi Nilaini khan MSSC Secretary pisaah thlahna hun hman a ni a, Ningani hian an hmun thar tur hi an pan zui dawn a. Kum 17 leh a chanve an tlin hunah army-ah an lut zui ang.

Tunah hian Pune-ah hian Mizo rit chawi chak pariat ngawt mai an awm sa mek a, a thar pathumte nen hian 10 chuang an ni tawh dawn a. An zingah hian Commonwealth Games 2022-a mipa 67 kg-a gold medal latu, Jeremy Lalrinnunga pawh a tel nghe nghe.

Ainawn Veng tlangval Jeremy-a bakah hian Lalzuidika, Zakhuma, TBC Lalchhanhima, Lalhunthara, Vanlalruata, Jacob Vanlaltluanga leh Silvan Beihrothatlo te an awm mek bawk.