ZALEN November 15, 2025: Chief Minister Lalduhoma chuan vawiin khan Tualte khuaa JH Lalnunmawia buh chhun fin (Mau tlawn zawn hnih leh Silai zawn chhun fin) leh buh thar lawmna a hmanpui a. Agriculture Minister PC Vanlalruata leh Deputy Speaker Lalfamkima, ten an tawiawm.

JH Lalnunmawia hian Tualte khuaa Artlang ramah Tin sawm leh pasarih hmuna zauvah buh a ching a. Tin sangthum leh zaruk a thar chhuak a, phur sangkhat leh zahnih a ni. Mizo buh tehkhawng anga sawiin Mau tlawn zawn hnih leh Silai zawn chhun fin anga tam nia sawi a ni.

Thusawiin Chief Minister chuan, "Hetiang hun hi vawiina kal khawmte hian kan la hmuh ka ring lova, kan hmu leh pawhin ka ring chiah tawh lo. A tam em avangin Mizo buh tam lam chhiar danah pawh hming a nei tawh lo a. Chuvang chuan he ni hi a hlu a ni," a ti. A tharchhuaktu JH Lalnunmawiate chhungkua lawmpuiin, midangte tana malsawmna thlen thintu an nihna Pathianin mal a sawm niin ka hria a. Mite tana malsawmna ni zui zel turin a ngen a ni.

Sawrkarin kuthnathawktute a ngaipawimawh tih sawiin sawhthing thartute iptea support price lut ringawt pawh hi a tam tham hle a. Hnathawktu, mi taimate tan kawl a eng mek a ni, a ti.

Tualte hian kuminah sawhthing atangin Rs. 163 lakh vel an lalut a, Tomato atangin Rs. 175 lakh vel an lalut tawh bawk a ni.