Puducherry-a 48th Sub Junior National Basketball Championship khelh mekah champion lai, Mizoram an kaltluang zel a, Thawhtanni zan khan quarterfinal-ah Jharkhand hnehin semifinal an lut a, Haryana nen final luh an inchuh dawn.

Mizoram rawlthar rualte hian group stage-a an tumpui hneh vek hnuah pre-quarterfinal pawh khelh hah ngai lovin quarterfinal an lut a, hetah pawh harsatna an tawk chuang lo.

Quarterfinal-ah pawh hian Jharkhand rawlthar rualten Mizoram hi an khan lo hle a, 72-30 a sawpin a thiam pali zingah an inhlang kai a ni.

Harsa lo taka semifinal an luh chungchangah head coach Marc Lalthlamuana Sailo (Tetea) chuan player mal fak bik tur emaw an awm lo tih a sawi a, mi mala innghahna nei miah lovin team game tha tak an khel a, chu chu an lawmna a nih thu a sawi.

“Pathian zar liau liau a ni a, kan nauten an khel tha zel a, an dan pangngaiin inrintawkna an nei a, rang takin an khel thei zel,” a ti a. “Mi mala innghat lovin, team game kan khel thei a, chu chu kan lawmna a ni a. Player pakhata innghah chu khelh chhiat tumin a tha lo thin a, tunah erawh chuan kan zavaiin tangkai takin kan khel vek a ni,” tiin ZALEN a hrilh. 

Champion lai hian final lut tur zawnnaah Thawhlehni zan dar 7:30 hian Haryana an hmachhawn leh dawn a. Hei pawh hi an hneh ngei a beisei tih coach Tetea chuan a sawi a, “‘Kan huphurh lo,’ han tih ngawt chu a dik lo vang a; mahse, hneh ngei erawh kan inbeisei,” a ti.

Mizoram hian final an lut a nih chuan semifinal lehlama Uttar Pradesh leh Madhya Pradesh inkhela chak zawk zawk an tum dawn a, champion leh theih ngei pawh an inbeisei hle.

Ningania inelna tanah hian Mizoram hi an khelh tawh chinah el pha an la awm meuh lo va. Group A-ah Maharashtra, Uttar Pradesh leh Kerala te awmpuiin an khelh hmasak berah 64-13 zetin Maharashtra an sawp a. Uttar Pradesh hmachhawn lehin 74-63-a hneh lehin an khelh hnuhnung berah Inrinni chawhma khan Kerala chu 80-23-in an sawp leh a, khelh thumah an chak vek.

Mizoram hi group stage paltlanga knock-out round lut zingah pawh a titha ber an nih avangin pre-quarterfinal an khelh hah ngai lovin quarterfinal lut sain an tum leh tur an lo nghak a, Pathianniah khan anmahni tum tur zawngin state dang an inkhelh laia awlin Thawhtanniah an khel leh chauh a ni.

Puducherry-a inelna khelh mekah hian a tir lamah Mizoram player 12 zingah damsam lo an awm nual a. An khelh hmasak bera Maharashtra an hmachhawn tum phei chuan dan pangngaia player 10 tal inkhel thei awm turah pariat chauh an awm a, tunah erawh harsatna lian lutuk an nei tawh rih lo.

Sub Junior National Basketball Championship hi Basketball Federation of India (BFI)-in state hrang hranga kum 14 hnuai lam, hmeichhia leh mipa inelna atana a buatsaih thin a ni a. Kuminah hian Puducherry-in thlengin Mizoram hian mipa team a tir a. Mipaah team 27 inlanin hmeichhiaah 25 an inlan thung.

MIZORAM TEAM:
Player:
1. Samuel Vanlalpeka, Kulikawn West
2. B Lalruattluanga, Tuikual South
3. Emmanuel Lalpekhlua, Republic Veng
4. Stephen C Lalhruaitluanga, Aizawl Venglai
5. Jacob C Vanlalruatdika, Khatla South
6. Ronie Vanlalawmpuia, Bungkawn7. Joel Lalbiakhlua, Khatla South
8. K Lalsangzela, Zarkawt
9. PC Lalruatfela, Dawrpui Vengthar
10. Reagan Zohmingsanga, Mission Veng
11. Lalrinchhana, Kulikawn West
12. C Lalfakzuala, ITI Veng

Manager: Raymond Lalengkima, Khatla South
Head coach: Marc Lalthlamuana Sailo, Zarkawt
Assistant coach: Z.D Denghmingliana, Kanan veng