Khawvel huapa talkshow lar taka a host leh a hming pawh ama hminga kalpuitu, Jimmy Kimmel tia an sawi hi James Christian Kimmel-a a ni a. November 13, 1967 khan Brooklyn, New York-ah piangin Mill Basin-ah a sei lian thung a. U pathum a nei a, American Express-a thawk leh IBM executive ni hialte pawh an awm.

Catholic chhungkua atanga sei lian niin a naupan lai hian maichama hmanraw dahtute pawh a ni hial thin.

Kimmel-a nu hi Italian thlah niin Ischia, Naples lam chhuak a ni a, an chhungkua hi 1883 lirnghing hnuah United States-ah an pem ta a. A pa lama a pute erawh German an ni a, an chhungkaw hming pawh German tawngin, ‘Kümmel’ tiin tun hma lam chuan an dah thin a ni.

An chhungkua hi Las Vegas, Nevada-ah Kimmel-a kum kua chauh a nih laiin an pem a. Ed W. Clark High School atanga a graduate hnuah University of Nevada, Las Vegas-ah a lut zui a, kum khat lek hnuah Arizona State University-ah insawiin UNLV atang hian kum 2013 khan honorary degree a dawng nghe nghe.

Kimmel-a patea, Frank Potenza (‘Uncle Frank’) chu Jimmy Kimmel Live!-ah hian kum 2003 atanga a thih, 2011 thleng a inlan thin a. A cousin Sal Iacono pawh Kimmel-a co-host niin an chhungkua hi an inpui tawn nasa hle a ni.

Tunah hian Kimmel-a hi khawvelin a hriat dan chuan American television host, comedian, ziak mi leh producer a ni a. Jimmy Kimmel Live! hi a host a, executive producer a ni bawk a. He show hi late-night talk show an tih ang niin ABC chuan January 26, 2003 khan Hollywood Masonic Temple, Hollywood, California atangin a tichhuak a. April 1, 2019 atang khan Kimmel-a chenna in pakhat zawk, Zappos Theater, Las Vegas Strip atangin tihchhuah a ni ta thung.

Ama show a kaihhruai bakah hian Kimmel-a hian Primetime Emmy Awards chu kum 2012, 2016 leh 2020-ah kaihruai tawhin Academy Awards pawh kum 2017 leh 2018 khan a kaihruai tawh bawk.

Jimmy Kimmel Live! hma hian Kimmel-a hi Comedy Central-in The Man Show leh Win Ben Stein-in Money an tihchhuah thinah co-host a lo ni tawh bawk.

Kimmel-a hi kum 1988 khan Gina Maddy nen an innei a, kum 2002 khan an inthen leh tawh thung a. An fanu, Katherine chu kum 1991 khan piangin an fapa, Kevin chu kum 1993 khan a piang bawk a. Comedian tho, Sarah Silverman nen pawh an inzui tawh nia sawi a ni.