Blackpink star Jisoo chuan a solo album hmasa ber 'ME' chu a tichhuak ta rup mai le. Album a tichhuah rual hian Jisoo hian record a siam nghal a, K-pop hmeichhe singer zinga album pre-order maktaduai khat nei tling hmasa ber a ni! 

Korean-pop group lar Blackpink hian tun hnai kum eng emaw zat chhung chu thawm an nei lian thei rem rem hle a, group leh mimal ang pawhin record an siam chho mawlh a ni ber. Jisoo pawh hian album a tihchhuah vawi khatnanah record a rawn siam nghal thei a, a boruak len zia chu kan hrethiam mai awm e. 

Kum 28 mi Jisoo hian 'ME' hi Zirtawpni khan a tlangzarh a, hla pahnih - Flower leh All Eyes on Me chauh a awm thung. YG Entertainment kaltlangin a tichhuak a, Interscope Records kutchhuak a ni. Tlangzarh hma hauh hian a album hi mi maktaduai khat chuang zetin an lei - namai lo tak a ni. 

Mellung pawimawh
Blackpink hian mellung pawimawh tak an phun chho zel a, an member pali - Jisoo, Jennie, Rosé leh Lisa te chuan an mahni pualin album an tichhuak vek tawh. Jisoo hi a tichhuak tlai ber a ni a, Jennie a che hmasa ber thung. Jennie hian kum 2018 khan 'SOLO' album a tichhuak a, Lisa chuan September 2021 khan 'Lalisa' a tichhuak bawk. Rose  chuan March 2021 khan 'R' a tichhuak a, Jisoo pawhin 'ME' a rawn tichhuak ve leh ta a ni. 

Blackpink hian kum 2016 khan an debut single album 'Square One' an tichhuak a, hemi hnu hi chuan an hawi kir leh tawh lo. Rimawi khawvela hming langsar ber zinga mi an i chho char char a, artist zinga YouTube-a subscriber ngah ber record thlengin an siam chho a ni. 

Guinness World Record-ah pawh an hming a chuang vang tawh a, girl group zinga Spotify-ah stream hlawh ber record an siam a ni. Reord siam tura an khum hi British pop group lar Little Mix an ni nghe nghe.