ZALEN May 22, 2026: Mizoram Pradesh Congress Committee chuan vawiin khan Friday Political Session an hmang a, he hunah hian MPCC Vice President John Rotluangliana, Ex. Minister chuan thu sawiin, "Anticipatory Bail ka lak avangin tawngkam chhe tak tak ten min bei a, sawrkar lai hi han bei ve ila chu an FIR leh tawh ang. BJP-in AAP an beih ang mai in min bei a ni. Mi thenkhat ten Anticipatory Bail a la a, a ngawi ta kar mai te min ti a. Ka ngawi kar dawn reng reng lo”” a ti a, a bail dil a hlawhtlin loh nan sawrkar ukil an tang hle tih a sawi.

John Rotluangliana chuan, "MNF sawrkar lai khan Skywalk leh Ropeway chungchangah ACB ah FIR an thehlut a, he hna hi Congress sawrkar laia bul tan a nih avangin khatih laia a hminga Minister incharge ka nih avangin mi tam tak ten thil dik lo ti angin min lo hmeh bel thin a.

Chumi chungchangah kal zelah chuan tunhnaiah min chargesheet dawn a, man hmingchhiat ngei min tum thu hi min duhsaktu ten min hrilh ru a. Engang pawhin man mualpho che an tum a, Anticipatory Bail lo dil teh an ti a. Thil harsa turah pawh kan ngai lova, mahse court-ah sawrkar ukil ten min object ta tlat a, kan la chhiar lova hun kan mamawh te an ti a, tlai dar 2-ah tih turin judge in hun a pe a. May ni 5 tlai dar 2-ah chuan sawrkar ukil te chuan political pressure a nat lutuk avangin kan object dawn an ti tlat a. Sawrkar ukil te chuan thi leh thau pawlhin an bei vak chungin ni 12.5.2026 ah chuan Anticipatory Bail kan hmu ta a ni," a ti.

MPCC Vice President chuan, "Ni. 19.05.2026 ah Chargesheet copy chu court atangin kan dawng ta a. Chuta min lo chargesheet-na chu Tourism Information Center sakna tur sum Revise Estimate a siamtir tih leh, Rajiv Nagar-ah Tourist Lodge sakna tur pawisa a divert tir tih a lo ni. Engpawh nise, Rajiv Nagar-a Tourist Lodge te hi sak zawh a ni tawh a, kan hawng tawh a, a bill erawh la pek zawh loh a ni a, Tourism Information Centre pawh hi Tourism Directorate bulah Office atan a hman nghal ni se tih a nih avangin Revise Estimate hi siam a ni," a ti.

John Rotluangliana chuan, "April ni 3, 2018 khan Skywalk bul tanna tur hian Sakawrhmuituai tlangah a lungphum phum a ni a. Khatih laia bialtu MLA Hmingdailova Khiangte leh R. Lalrinawma, Deputy Speaker te khan min tawiawm nghe nghe a ni.

Swadesh Darshan Project hi central project niin Mizoram tan Vaibelchhe 99 min sanction a, cheng Vaibelchhe 49 hi hmuh tawh a ni. He project hnuaiah hian Skywalk leh Ropeway bakah hna hrang hrang 8 vel lai a awm a ni. Chutihlai chuan mi thenkhat ten Vaibelchhe 49 hi Skywalk leh Ropeway atana hmang zo vek ang ten thuchhuah an lo siam a, an hriatchian loh vang a ni a, pawi ka ti khawp mai.

MNF sawrkar khan chhunzawm duh lovin FIR te thehlut in harsatna te siam a nih tak avangin he project hi central sawrkar in an rawn cancel ta a. Mizoram sawrkarin cheng Vaibelchhe 50 lai kan chan phah ta a ni. Tunah hian la sawrkar ila kan thalaite hi Ropeway ah an chuang ang a, Skywalk ah an kal tawh ang. Engvanga pamtul nge kan tih chuan MNF sawrkar in an chhunzawm duh loh vang kha a ni," a ti.

MPCC Vice President chuan, "Skywalk leh Ropeway ah hian min bei engang mah se, cheng khatmah ka eiru lo tih hi Pathianiin min hriatpui a ni. Court in dik takin ro a rel ang a, thudik chu a rawn lang mai dawn a ni. ZPM sawrkar pawh hian an sawrkar ukil te hmangin ti khawtlai zawng ni lovin, thudik hai chhuah a nih thuai teih nan hma la turin ka ngen a ni. Vawiin ni ah hian ka sawi duh chu nasa takin min bei mah se, in Vice President hian ka eiru lo a ni tih hi ka sawi ve duh a ni. Engvangin nge he project hi MNF-in an tih hlawhtlin duh loh," a ti bawk.