February 26, 2023; Johnson Gargen neitute chuan thuchhuah siamin, an restaurant ah duh tawk a zu lam tur awm anga sawi an ni chu thudik lo a nih thu leh Johnson Gargen ah engtik lai mahin zu an zuar ngai lo tih an sawi.

Hemi chungchang vawiin a thuchhuah an siamah, Mannfred Z. John,  Nicholas Z. John leh Ramthansiama te chuan, "February ni 23, 2023 (Ningani) khan Assembly House-ah MLA zahawm tak Pu Zodintluanga'n Johnson Garden a kan Restaurant (Zuangtui piah Muanna Veng Go-Down pelh kawngthlang ami) chu thu dik lova puh hmingchhiat tumin, Whisky, Wine leh Rum duh tawk a lam tur a awm thin angin min puh a. He tiang a thudik lo leh belhchian dawl lo, finfiahna sawi tur engmah nei lova MLA zahawm takin Assembly House zahawm tak chhungah ngei min puh hi kan hrethiam lovin, kan la na hle a. Mizo thalai Entrepreneurs, mahni kutkawiha eizawnna daptute min fuih (encourage) zawng ni lova, thudik lo hmanga kan rilru tina leh tihnual zawnga kan ram hruaitu atana thlan a tawng chhuak mai hi Mizo thalaite tan a pawi takzet bawk a ni," an ti.

"Johnson Garden-ah hian engtik lai mahin zu kan zuar ngai lova, sorkarin phalna neite tana zawrh a phal, Mizoram tharchhuah grape atanga wine siam tak ngial pawh kan zuar ngai lo," an ti a, "Finfiahna nei si lova hetianga min puh mai hi kan sumdawnna min tihchhiatsak tumna a nih bakah Assembly House leh member zahawm tak takte zah lohna lian tak, mipui hmuhsitna tling a niin kan hria. Zu lam chi reng reng kan zuar lo," an ti bawk.

An restaurant ah eitur tui tak tak, Menu thar ami, a hma anga man to tawh lo leh Mizorama la awm ngai lo an zuar tih tarlang bawkin, Live music leh performance te pawh neih chhoh zel an tum thu te an tarlang.