ZALEN, September 08, 2025: Punjab-a 75th Junior (Boys) National Basketball Championship Level 2 final-ah Himachal Pradesh chuan kum 2011 final-a an tlawmna phuba lain Thawhtanni chawhma khan Mizoram an hneh.

Kum 18 hnuai lam tana Basketball Federation of India (BFI) buatsaih inelnaah hian Mizoam hian kum 2011 khan Level 2-ah final lutin Himachal Pradesh hi an lo hneh tawh a, kumin final-ah inhmachhawn lehin Himalaya tlangdunga awm state hian 69-51-a hnehna changin kum 24 hnuah an tlawmna an chhang let.

Ludhiana Basketball Academy, Guru Nanak Stadium, Ludhiana-a Thawhlehni atanga inelna khelh tanah hian Mizo rawltharte hian Group C-ah vawi li khelhah vawi thum hnehna changin group stage an khar a, an group-ah Gujarat phak lovin Level 1 an kai pha lo.

Level 2-ah knock out round an khel zui a, hei hi nakum inelna ranking siamna niin group stage-a pahnihna zelin group danga pathumna an khelh.

Level 2 knockout round-a an inlan hmasak zawkah Mizoram hian Zirtawpni chawhma khan Jammu & Kashmir lakah 61-40-a hnehna changin semifinal an lut a. Semifinal hi Pathianni tuk khan khelin Uttarakhand lakah 57-65-in hnehna an chang leh a, final an lut a ni.