Aizawl: State Transport Authority meeting chu July ni 22,2016 a nei turin koh a ni a, 2 wheeler taxi bakah Aizawl dai vela auto rickshaw permit pek chungchang an rel ang. 2 wheeler taxi service kalpui dan tur Zalen zawhna chhangin Transport department thawktute chuan khawpui lian danga kalphung lar tak company indina 2 wheeler tam tak leia, hlawh neia midang khalhang ni lovin mimal in register anga kalpui tum a nih thu an sawi. Transport department hotute chuan two wheeler taxi chu thalai eizawnna nei lo ten an hman tangkai theih ngei an duh thu Zalen palai hrilhin, company te lo luh tir tumna a awm loh chhan pawh niin an sawi bawk a. Two wheeler taxi-a hman tur chu kum hnih aia upa lo, Engine len zawng (capacity) 150 cc aia tê lo eng chi pawh hman theih a ni dawn a, lirthei ah hian company thlan bik a awm loh thu an sawi bawk. Two wheeler taxi Driver te chuan Full face helmet ISI mark chuang, rawng eng (yellow) chauh khum phal an nih tur thu Zalen palai hrilhin,'Helmet thehlem zawk 'satel helmet' tia hriat lar leh a dang hetiang chi khum phal a ni dawn lo' an ti. Zalen thudawnna chuan two wheeler taxi a awm hnu chuan local taxi te nen competition a awm tawh dawn avangin mipui tan a tha zawk dawn a, taxi rate mumal lo tak pawh a ziaawm phah ngei dawn nia a lan thu a sawi. Two wheeler taxi hi ram hrang hrangah an lo hmang tangkai tawh hle thin a, GPS tracking te pawh dah a ni thin a, Mizoram ah erawh dah tel a ni dawn lo a. Transport department hotute chuan GPS dah chu tha viauin lang mahse a man a to tham avangin Two wheeler taxi neituten an tlin loh an rin avangin tun dinhmunah chuan tih tel a ni dawn lo niin an sawi bawk.