Aizawl: Aizawl Municipal Corporation hotute atanga thudawn danin internet kaltlanga insak phalna (building permit) dilna chu June 1, 2018 ah hawn tan tum a ni. AMC hotute chuan Zalen zawhna chhangin June 1, 2018 ah permitdilna hi hawn (launch) tum anih thu leh hemi ni a thlen hma hi chuan internet kaltlanga insak phalna dilna siam a nih dan kimchang hi an la puangzar thei lo niin an sawi a, AMC Councillor te pawh briefing neihpui hmasak vek an nih dawn thu an sawi bawk. AMC hotute chuan insak phalna chu internet kaltlang ni lo, a pangngaia kalpui zel a nih leh nih loh tur pawh internet kaltlanga dilna an enchhin (trial) mek azirin an sawi chiang dawn niin Zalen an hrilh bawk. AMC hian Building permit dil mek te tana rang taka chinfel sak an nih theih nan May 11, 2018 khan AMC Auditorium, Thuampui-ah Special Building Clinic an buatsaih a, hetah hian May 7 hmaa dilna thehlut zawng zawngte chu chinfelsaka, permit pek nghal an ni. AMC chuan an hnuaia in register tawh Technical License Holders te chu May 10, 2018 khan an auditorium-ah training an pe bawk.