Premier League chuan an hnuaia club-ten nipui chhunga an bazar theih hun tur a tifel ta a, June 14 atang hian season thar atan player an seng lutin an an inhralh thei tan dawn.

Contract nei lai player-te hun tawp erawh  June 30 thleng a ni dawn a, man lova lak theihte chu July 1 atang thovin official-in an chhuak thei dawn tihna a ni a; mahse, club-te chu a hma chawlhkar hnih atangin an lo intifel thei dawn tho thung.

Free agent-te chhuahtir leh lei dan hi tual chhung leh ram dang atanga lak luh leh chhuah dan erawh a hun a danglam hret a, July 1 hma chu engmah intihfel lawk theih a ni dawn lo a ni.

England-ah hian league sang bera khel team 20-te chuan thla khat leh a chanve chhung bazarna hun an nei dawn a. Team 20 zingah hian kai thar tur, Burnley leh Sheffield United bakah thla tawpa Championship playoff final khelh hmabak pahnih, Luton leh Coventry-a khawi emaw zawk zawk an tel bawk.

Nipui bazar hi September 11 zan dar 11:00 BST (India-a September 2 zing dar 3:30) thleng hawn a ni dawn a ni.

Season liam ta lamahte khan Premier League club-te hian Europe-a league dangte aiin bazar theih hun an nei rei lo hret thin a, hnawhsaruma inlei leh inhralhte pawh a awm phah nia ngaih a ni a. Season thar atan bik erawh an hnuaia English Football League (EFL) leh Spain, Germany, Italy leh France-a league thuneitute nen indawrin a rualkhaiin an ti ve tawh dawn.

Europe-a league lian pangate nen an bazar theih tawp ni a inang tlang tawh dawn tihna a ni.

Thlasik bazar theih hun pawh ruahman nghal niin January 1, 2024 atangin hawn a ni ang a, February 1, 2024 zan dar 11 GMT (India-a zing dar 4:30 thleng) hun hawn a ni dawn a. Thlasik bazar theih hun pawh hi La Liga, Bundesliga, Serie A leh Ligue 1 te nen a tawp ni a inang leh tho dawn bawk.