Aizawl; Mizo Zirlai Pawl (MZP) chuan June 14,2014 ral hma ngeia zirtirtu semrual hna thawk turin sawrkar an ngen a, an ngenna in awmzia a neilo anih chuan zirtirtu nei mumallote harsatna sukiang turin a tawp thlengin hma an la dawn tih an sawi. Nimin khan Aizawl Press Club ah chanchinbumite kawmin MZP hruaitute chuan hun rei tak sawrkar enkawl zirna ina zirtirtu indaihlohna sutkian anih theihnan hma an lo la tawh tih an sawi a, a bikin thingtlang lama zirna in ten zirtirtu an neih mumalloh chhan chu zirtirtu tlem vang ni lovin zirtirtu awmsa semrualloh vang a ni an ti. MZP hruaitute chuan School Education dept. in MZP zawhna a chhan dan ang chuan Mizoram sawrkar enkawl Primary School in zirtirtu pali theuh in nei ta se, zirtirtu 40 lai an la bang dawn tihna a ni a. Sawrkar enkawl Middle School tinin zirtirtu pariat theuh in insem ta se, zirtirtu 199 lai an la chuang dawn tihna a ni bawk a. Heng bakah hian SSA hnuaiah bik Primary School zirtirtu 550 awm in, Middle School (UPS)-ah zirtirtu 1643 an awm a, Art Instructor 410 leh Health Instructor 404 an awm bawk a. Art Instructor leh Health Instructor-te hi UPS-a awm tura tih an ni a, mahse zirtirtu indaihlohna avangin Primary School-ah pawh dah tel tho niin zirtirtu pangngai ang veka chhawr an ni a. Special Trainer te hi chhawr chhunzawm tawhlo mahse zirtirtu awmsa te semrual an nih chuan harsatna engmah a siam dawn chuanglo a ni, an ti. Middle school ah Govt. Saikuti M/S Thingsai chuan zirtirtu 3 an nei a, Upper Sakawrdai leh Zokhawthiang M/S chuan 2 ve ve an nei. MZP President Lalhmachhuana chuan khaw thenkhat a zirna in tam lutuk, zirlai tlem bawk si te chu sawikhawm a, zirtirtu pawh an indaih deuhna atan hma an la tih a sawi a. Heng zirna in te hi zirtirtu thenkhat, awmna tur (quarter) neilote chenna atan hman nise tih rawtna pawh sawrkar ah an thlen tawh niin a sawi bawk. 1. MZP in RTI hmanga zawhna an siam School Education department in a chhan dan chuan Mizoram ah Primary School 859 awmin zirtirtu 3476 an awm a, Middle school 533 ah zirtirtu 4463, High school 199 ah zirtirtu 1666 leh Hr.Sec. school 20 ah zirtirtu 438 an awm 2. MZP tarlan danin Primary school ah zirtirtu nei miahlo school 2, pakhat chauh nei 28, zirtirtu 2 nei school 69 an awm. 3. P/S a zirtirtu neilo te hi Ngentiang leh Selam P/S te an ni a, Ngentiang ah hian Lungpho Middle School zirtirtu pakhat chuan tlawmngaih chhuahin a zirtir thin a. Selam ah hian special trainer an neih thin chu chawlhtir an nih vangin zirtirtu hi an nei ta lo a ni.