Aizawl: Bible House, a dinna lei chet avanga sawn luah chhunzawm theih loh chu an building thar tur Khatla veng BSNL Office thlangah June 2, 2018 hian a sakna tur lung phum a ni dawn. BSI, Aizawl Auxilliary Secretary Upa Thangnghilhlova hnen atanga Zalen thudawn danin Bible House thar sakna tur lung chu June 2,2018-a Bible Society of India (BSI), Aizawl Auxilliary kum 40 na (Ruby Jubilee) lawm pahin Chief Minister Lal Thanhawlan a phum dawn niin a sawi a, tunah hian architect-in a building ruangam tur an buaipui mek thu a sawi bawk. Upa Thangnghilhlova chuan tuna an hmun chu sawrkar hotuten rem hre takin a building hlui atanga hla lo te hmun laili tha takah an pe tih a sawi a, hemi avang leh sawrkarin a sakna tur fund Rs nuai 407 an pek avangin sawrkar chunga an lawm thu a sawi bawk. Bible Society ofIndia hi tunah Synod Conference Centre-ah an awm mek a. BSI, Aizawl Auxilliary Secretary Upa Thangnghilhlova chuan Synod Conference Centre ah hian room 2 leh warehouse 1 an luah thu leh a hmingin electric bill leh a dang dang man tur Rs. 7000 lek thla khatah chawitir an nih thu a sawi a, hmun remchang siamsaka lo ngiahtuahtu Synod hruaitute chungah an lawm hle niin a sawi bawk.