Manchester United chuan a vawi 21 nan FA Cup final an lut leh ta a, June 3 hian final-ah an thenawm, Manchester City nen Wembley-ah derby match khelin nomawi an inchuh ang.

Inrinni zana City-in Sheffield United hneha final an inpet kai hnuah Pathianni zan khan United hian Brighton & Hove Albion chu hun pangngai leh pek belha 0-0 a an hnehtawk hnuah penalty petah 7-6 a hnehin final lut tam ber record ding lai nihrualin nomawi la thei turin an inchhawp hnai veleh.

Wembley-a inkhelah hian Seagulls-in inkhel thunun zawk mah se goal an thun thei lo. Paraguayan starlet Julio Enciso hun tha neih chu David de Gea-a’n dansakin a tawpa penalty hlahtu awm chhun, Solly March-a’n hun tha a neih a hmang tangkai lo bawk.

United tan Bruno Fernandes pawhin hun tha a hmang tangkai lo va, chance tha ber erawh Brighton striker Danny Welbeck-a chan niin a lo khelh tawhna team lamah a thun thei lo thung.

Minute 90 chhunga goal a luh loh hnuah extra time-ah United tana tuna season-a goal thun tam ber ni mek, Marcus Rashford chuan hun remchang a hmu a; mahse, Seagulls keeper Robert Sanchez-a’n a lo ben persak hram a, penalty hmanga chak zawk zawn a ngai zui.

Penalty petah hian a vawi thum nana FA Cup semifinal lut, Brighton-in pet hmasain team pahniha pettu hmasa panga ve vein an pet lut vek a, pakhat ve vein an pet luh leh bawk hnuah March lo pen chhuakin goal kham chungah a thlawh ta luah bik a. A dawtah Victor Lindelof chuan a chhuih lut ta bik si a, United chu 7-6 in an chak ta a ni.

United hian February thla khan League Cup final-ah Newcastle United hnehin nomawi an lo la tawh a, a pahnihna tur pawh an khawih pha leh ta dé dè e.

June 3-a an hma hmachhawn tur, City hi nomawi pathum beisei lai an ni ve thung a. League-ah Arsenal phak rih lo mah se an umphak mai rinna a lian hle a, Uefa Champions League-ah semifinal an lut tawh bawk.

Pep Guardiola team hian nomawi pathum an la rual vek thei a nih chuan final-a an hmachhawn tur team-in kum 1999-a an lo hlen chhuah tawh, treble champion nihna khumin a ti leh thei hmasa ber an ni dawn a ni.