ZALEN May 31, 2026: Lengpui Airport tumhmun chei that hna chu thawh mek niin thawh tura ruahman 95% vel thawh zawh a ni tawh a, harsatna dang a awm loh chuan June thla chhung hian zawh fel hman beisei a ni.

ZALEN-in aviation department thawktute hnen atanga thu a dawn danin tun dinhmunah Lengpui Airport tlankawng (run way) chei that hna hi 95% vel zawh a ni tawh a, ruahmanna hmasaah April thlaa zawh tum ni mah se ruah sur vangin hna a khaihlak a, tum angin hna a thawh theih loh tih an sawi.

Lengpui tumhmun tlankawng chei that hna hi Brahma Company, Rajasthan-in an thawk mek a, Mizoram PWD-in an vilpui bawk.

Tumkawng siam thatna atan hian Meghalaya atangin lung chang tha bik lak luh a ni a. Airport chei that hna hi zawh a nih ve leh a that tawk leh tawk loh enfiah nghal a ni ang.

Aviation thawktute sawi danin Lengpui tumhmunah hian Indigo leh Alliance Air an service mek a, khualzin pawh an thahnem thei hle a. Khualzin zinga a zatve deuh thaw hi Manipur lam an ni.

Aizawl leh Churachandpur inkarah helicopter kar khatah vawi hnih thlawhtir thin a ni a, mipuiin an chhawr tangkaiin seat pawh a full deuh reng a. Helicopter service hi tihbelh tumin hmalak mek a ni.

Lengpui Airport-ah hian khualzin lut chhuak an pung nasa hle a, nikum 2025-26 chhunga sum a thawh chhuah hi Rs. 18,00,36,304 a tling a. Airport atanga sum hmuhna hnar lian ber chu Usher Development Fee (UDF) leh Aviation Security Fee (ASF) atangin a ni a, hei bakah hian rental charge te, display hoarding leh parking fee an lakte atangin sum an hmu bawk.

Thudawn danin Lengpui Airport-a thlawhna tlankawng hi a that tawk loh avangin Central Road Research Institute chuan siam that nise tiin rawtna a thlen a, hemi bawhzui hian Mizoram sawrkar chuan siam thatna tur a ruahman a ni.

Thudawn danin thlawhna tlankawng hi a that zawng tehna, Pavement Classification Number (PCN) chu 38 a ni mek a, hei hi PCN 55-ah tihsan tum a ni.

PCN a that tawk loh vang hian thlawhna lian pawhin a phurh tawk aia tlem a phur thin a, Airbus-ten passenger 180 an phurh theih laiin Lengpui thlawhna tumhmunah hi chuan a phurh theih zat aia tlem (10%)-a phurh a ngai thin a. Passenger 180 phur thei pawh 165 chauhte an phur thin nia thudawn a ni.