Aizawl May 14, 2023 ; Mizoram sawrkara Aviation Wing hotute chuan June, 2023 atangin Aizawl leh Delhi inkar flight tam zawk a awm theih an beisei tih an sawi a. Hetihlai hian kum 2022 leh kumin April thleng khan Pawan Hans helicopter service-ah passenger 15,629 an awm.

ZALEN-in aviation wing hotute hnen atanga thu a dawn danin, Regional Connectivity Route (RCR) Aizawl - Kolkota - Agartala chu thla ruk chhung enchhin a nih hnuah passenger an tam tawk loh thin avangte leh Aizawl - Delhi, Delhi - Aizawl direct flight-ah indaih lohna a nasat zawk avangtein June, 2023 atangin flight tihpun theih beisei a ni a, chumi tur chuan hmalak mek a ni.

Hetihlai hian Mizorama Pawan Hans helicopter sevice chu mipuiten tangkai takin an hmang mek tih aviation hotute chuan sawi bawkin, nikum 2022 chhung zawng leh kum January atanga April thleng khan passenger 15,629 an awm tih an sawi.

Tun dinhmunah helicopter hi pakhat a service mek a, hei hi pahnihah tihpun tuma hmalak niin a hlawhtlinna hmuh theih thuai beisei a ni.

Lengpui Airport-a thlawh service mek chungchangah pawh Air India-in March 18, 2023 atanga an flight an tihtawp hnuah a thlaktu tur zawn mek zel a la ni bawk a, hmuh thuai pawh a beiseiawm niin aviation hotute chuan ZALEN an hrilh.

Tun dinhmunah Lengpui Airport-ah hian Indigo leh Alliance Air te an service mek a, Air India awm lai pawhin, Indigo hi flight ngah ber an ni reng thin.