ZALEN, July 21, 2025: All India Football Federation (AIFF) Junior Boys’ National Football Championship for BC Roy Trophy 2025-26-a an inkhelh hmasak berah Thawhtanni tuk khan Mizo naupangten si sawm faiin Chandigarh an sawp.

Sahibzada Fath Singh Football Stadium, Amritsar, Punjab-a Group D inkhelah hian Mizoram tan R Lalremruata leh Enok Lalchelzing te chuan goal hnih ve ve an thun.

Remrema hian minute 22-ah Mizoram goal hmahruai thunin second half tan atanga minute thumah Mizoram goal rukna leh a goal hnihna a thun leh a. Durtlang rawlthar goal hnih inkarah hian Joel Lalremruata, Omega Lalawmpuia Ralte, Lalrempuia leh Malsawmdawngkima ten goal khat theuh an thun bawk.

Defender Ekok-a’n minute 55-ah Mizoram goal rukna a thun hnuah minute 74-ah Mizoram goal 10-na a thun leh a. Armed Veng, Aizawl rawlthar goal thun inkarah hian Zoramdinthara leh chawlhlawk hnua bench atanga lut, Lalawmpuia’n a thun bawk.

Junior Boys' National Football Championship khelh mekah hian Mizoram hian an group stage-ah Nilaini hian Chhattisgarh hmachhawn lehin Zirtawpniah Maharashtra an khel leh bawk ang.

Thawhtannia an group inkhel dangah he chanchin ziah lai hian Chhattisgarh leh Maharashtra an inhmachhawn mek bawk.

Junior Boys’ National Football Championship for Dr. B. C. Roy Trophy hi kum 1962 atanga khelh tan tawh kha niin a tirah chuan kum 19 hnuai lam inelnaa kalpui thin niin 2023-24 atang khan kum 15 hnuai inelna a ni leh a, Telangana chu champion lai an ni.

Kuminah hian state/union territory 16 inelin group liah then an ni a. Group tina a sang ber theuhten semifinal an lut ang a, karleh Thawhtanniah semifinal hi khelh tur niin July 30-ah final khelh a ni ang.