Juventus chu tun hma lama player an lei danah dan bawhchhiat an lo neih nual avangin point 10 paihsak that leh an ni a, tunah chuan Europe-a inlan an hlat leh ta rih hle.

Juve hi tuna an thubuai avang tho hian January khan point 15 paihsak an ni a; mahse, Italy-a sports thubuai ngaihtuahtu court sang ber chuan April thla khan hnuh kirsakin an thubuai chu ennawn leh turin a ti a. Hei vang hian Serie A-a an dinhmun pawh a san leh phah.

Thawhtanni zana Empoli an hmachhawn hmain thutlukna thar hi a chhuak leh ta a, tunah chuan pahnihna atangin pasarihnaah an tla thla leh ta a. Serie A atanga Europe-a inlan thei hniam ber pawh an phak rih lo.

Italy-ah hian Napoli chu champion an ni chiang tawh a, Thawhtannia thutlukna thar a chhuah hma kha chuan Juve hi pahnihna an ni.

April khan Sports Guarantee Board chuan Italian Football Federation (FIGC) appeals court-in point 15 a paihsak chu hlihsakin a pe let. Appeals court hnenah hian club leh club-a mi pawimawh, vice-chairman hlui, Pavel Nedved pawh telin, an chunga hremna a pek chu ennawn leh turin a ti bawk.

Hemi tum hian chairman hlui Andrea Agnelli, chief executive hlui Maurizio Arrivabene leh sporting director pahnih, Federico Cherubini leh Fabio Paratici te hun rei tak hremna pek erawh a ngai anga kalpui tura tih a ni thung.

Juve hian Thawhtanni zan inkhelah Empoli chu hneh pawh ni sela season thara Champions League khel thei tur hniam ber dinhmuna ding mek, AC Milan chu khelh hnih la awmah point hnihin an la phak lo dawn tho va. An chak lo a nih phei chuan Europa Conference League khel pha dinhmunah pawh an ding thei rih dawn lo a ni.

Italian giants hi tuna an hremna thubuai bakah hian sum an enkawl leh kalpui danah thubuai an nei mek bawk a, hetah hian Agnelli pawh telin, tuna la thawk lai leh thawk tawh lo, an club-a dinhmun pawimawh lo chelh tawh mi 12 lai court-a inlan ngai thei dinhmunah an ding mek.

Italian news agency-te chuan high court-in he an thubuai hi October 26-ah a ngaihtuah dawn niin an tar lang hlawm a. Hetah hian thubuai sawina tak tak chu thil thlenna hmun, Turin-ah nge Milan leh Rome-ah zawk neih tur tih an tichiang dawn niin an tar lang bawk.