Thomas Tuchel-a pawl te chuan Champions League quarter-final lut tur zawnna inkhelh pawimawh takah nizan zanlai khan France club Lille chu 2-1 in an hneh a, first leg-ah 2-0 a an lo hneh tawh bawk vangin aggregate-ah 4-1 in an chak. 

Inkhel pakhat zawkah Villareal chuan Italian club lian Juventus chu si thum faiin an sawp a, mualpho takin Juventus hian Champion League an mangtha a ngaih phah. 58% zet ball changtu zawk ni mahse Juventus an che hlei thei lo va, first half-ah goal a lut lo. Leg hmasa zawkah 1-1 in indraw mahse nizan secondhalf-ah goal 3 zet an chhuah leh avangin belh khawmin Villareal hi 4-1 chakin Champions League quater-final an lut ta zawk a ni. 

Chelsea leh Lille inkhelah hian first-half minute 38-ah Jorginho handball vangin Lille lamin penalty an hlawh chhuak a, Burak Yilmaz chuan goal-ah chantirin 1-0 in hma an hruai. Tuchel-a pawl ten si phur chunga chawlhlawk hman an tum bik lo. Nawr letin minute 45+3-ah Jorginho siamsak hmangin Christian Pulisic-a'n goal thun ve lehin an si phurh a sut. Second-half minute 71-ah Mason Mount-a chuan Chelsea chakna goal a khung ve leh. 

Inkhel pakhat zawkah hian first-half ah goal a lut lo va, minute 78-ah Gerard Moreno chuan penalty hmangin Villareal goal hmahruai thunin minute 85-naah Pau Torres chuan an goal hnihna a thun belh ve leh a, hun tawp dawn added time 90+2-ah tal buai Juventus lamin penalty an chawi leh a, an chakna ti chiang turin leh an goal thumna turin Danjuma chuan chiang takin a thun leh a, hun a tawp zui. 

Inkhelh banah Tuchel chuan,"Tunah chuan team riat chiah awm zingah ka inhlang kai tawh a, hma sawn chhauh zel kan tum ang ang a, team zawng zawngin a an tih nih ka duh a ni," a ti.