Aizawl March 16, 2022 : Parliament budget session neih mekah Mizoram Rajya Sabha MP K.Vanlalvena chuan vawiin khan thu sawiin Mizoram-in FCI atanga thlatin buhfai a dawn chu kan state mamawh zat chanve chauh a nih thu sawiin a zatve dang chu open market atanga Mizoram sawrkar-in man to zawka a lei a ngaih thu a sawi a. FCI atanga kan buhfai dawn zat tipung turin Central sawrkar a ngen a ni.

Vena chuan North Eastern State hrang hranga FCI structure chu siam danglam a tul thu sawiin state 4 - Assam, Arunachal, Nagaland leh Manipur ten anmahni state ah theuh FCI Regional office an neih laiin state dang 3, Mizoram,Tripura leh Meghalaya ten NEF hnuaiah office pakhat Shillong-a mi an intawm chu a dik lo a ni, a ti a. State pathumte hian a hrang theuha mahni state ah FCI Regional office neih a tul tih a sawi bawk.

Vawiina Parliament session-a Vanlalvena thusawi țan laiin Rajya Sabha Chairman M.Venkaiah Naidu chuan tunhnaia Mizoram a rawn tlawh thu leh State Assembly-ah thu a sawi tih tarlangin Mizoram Legislative Assembly chhunga rorelna kalpui dan chu buaina awm ve ngai lo, ram pum tan entawn tlak a ni, a ti a. Pu Vena chuan Rajya Sabha Chairman M.Venkaiah chu Mizoram a rawn tlawh avanga lawmthu hrilhin lo kal leh ngei tura a beisei thu a sawi bawk a ni.