“I mawina zawng zawng ka hma-ah i rawn chhawp chhuak a, i tuina lai te, ka tana i hlutna tur te, min hmangaih chuan tiin ka hnenah thu kha i tiam a ni si a, min hmangaih chhanletna atan tiin nghakhlel takin ka lo thlir ve reng che a sin. Ka hmangaihna ka pe sauh sauh che a, i thutiam ka hnenah i ti puitling ta mang si lo, nangmah i inhmangaih tuk a, nangmah tilawmtu che an dang ta em ni? Kei chu sirah min hnawl  ta si a maw??”“I mawina zawng zawng ka hma-ah i rawn chhawp chhuak a, i tuina lai te, ka tana i hlutna tur te, min hmangaih chuan tiin ka hnenah thu kha i tiam a ni si a, min hmangaih chhanletna atan tiin nghakhlel takin ka lo thlir ve reng che a sin. Ka hmangaihna ka pe sauh sauh che a, i thutiam ka hnenah i ti puitling ta mang si lo, nangmah i inhmangaih tuk a, nangmah tilawmtu che an dang ta em ni? Kei chu sirah min hnawl  ta si a maw??” Ka hmangaih che min tihlai tak kha aw!! Siamtuin duh tak leh lungawi taka min duan, ka sakhmel-ah khan mawina chhete a lo bet ve a, chu mi hip theihna chuan mak tak maiin a rawn hip kal che a, hriat ngai loh kan intawng a, hriat ngai loh kha inrintawnna kan pahnih inkarah a lo piang ta reng mai, keimah ang bawka nangmaha mi hipna chak tak mai chu kei pawhin ka hmu thelh bik lo, i miziaah khan Pathianin a bik taka thiam thil a pek che kha a mawi ka ti a, ka hnenah khan thu mawi tak takte i rawn sawi thin a, i duh anga ka awm chuan nakin hnuah i thutiamte chu a hlawhtlin hunah kan hlimna tur a ni tih i sawi a, hlimna mai a ni lo, hmasawnna leh changkanna te kha i sawi malh malh thin kha a ni a, khang hun laia ka bula tih tak zet  ni awma ka hriat che leh ka hmuh che kha ka thla a va muang tak em! Keini chauh kan lo ni hlei nem maw! Thutiam hmangaihna kha mi dang pawn an lo nei ve thluah niin, chung thutiam chu a ropui teh hlawm a sin. Mi mal hmasawnna tur te, chhungkua hmasawnna tur te, chhungkua intodelhna tur te, ram hmasawnna turte a awm vek a, tumah in itsik lo va, kalho dial dial tur kan nihna te ka han ngaihtuah let chang hian ka lung a leng thin hle a ni. Hun leh nite a rawn inher liam zel a, ka hmangaih che min tihlai kha tunah chuan boruak mai a ni ta si a. Ka mi hriat a kha chu a la awm a; mahse, a thinlung erawh chuan min kalsan rih a, engtik niah emaw chuan min la rawn duh leh ngei ngei dawn a ni tih hi a mi hmangaihna min tiam atangin chiang takin ka hmu a ni. Nang chuan ka hnen atangin duh i nei a, kei pawhin ka nei ve tho si a, duh leh duh, rilru inhmutawn taka awm kha chu a lo nuam ve hrim hrim a, Mahse, hmangaihna an lo tih hi nangmahah hian a lo awm lo reng reng nge!!? Hmangaihna hi eng emaw a lo nih leh tihte thui takin min ngaihtuahtir lo thei lo a ni. Hun liam ta min thlirlettir turin keimahah sulhnu min lo hnutchhiah hi ka theihnghilh thei tawh dawn lo a ni. Chu ka thu theihnghilh thei tawh lo tur chu a tha zawng a ni lo lehnghal a, ‘Intentawnna’ hriatreng tlak min hnutchhiah mawlh mai hi a pawi ka tih ber chu a ni. Khawvel mawina hi em ni i hmangaih zawk chu le? Mihring hian ropui kan thlahlel em em a, mite aia chungnung nih kan duh a,  milar te, mi hausa te ang nih vea khawvel parmawina hi he kan lei dam chhung ngei hian kan duh a ni. Kan intlansiak a, a then an hlawhtling a, tam tak chu hlawhchhamna khurah kan tlulut thin a ni. Lalna leh thuneihna chuh turin mihring rilru tha lem lo tak hian thil sual tih a hreh reng reng lo a ni. Mi dang lo lian tur dan phet tuma phesek, a langa fel nih duh si, a tak ramah chuan mahni chauh indah pawimawh viau te ang hi i lo ang berin ka hria a, duh i neih lai chuan min nuih tlawn a,  taima ber leh inngaitlawm ber ang ziazangin, tawngkam thlum tak tak ka thinlunga tuh i tumte kha ka hmu a, a hunlai chuan tak tak emaw tih mai tur a ni. Khatiang reng renga mite bula i thiam, finna te i lantir chuan tunge hmin lo awm ang le? An tlu duai duai vek ang chu, thu tha pui pui, thutiam tha tak tak i nei thluah si a, chu thutiam chu nun khawchhuahna atana hman tlak a ni a, hlen chhuah ni vaih se chuan kan ram chhungkua hi kan dam ang mawle! Kan khawtlang kan dam ang mawle. Hmangaihna chhungkhung tura i kal kual zak zak lai te, engkim mai kha i thusawi angin hmangaihna thutiam i nei ziah mai te kha lehlamah chuan min tilawmtu a ni ve bawk a. Khatih laia nangmah ka hmuh dan che kha chu maw?  Engkimah hian i tling vek ni mai hian ka hria, Chhungkua pa berah i tling a, chhungkua  enkawl dan turah pawh hmalam hun thui tak thlir thiamah ka ngai che a, chu mai a ni nang le, khawtlang hruaitu, ram khat pawh hruaitu ni ta la, i va han tlin rep rep dawn em aw!! tiin ka ngaihtuah a, ka pawm thlap a ni ber e. Lalpa tih chu hausakna a ni a, finna bul a ni a, ama tana kan rinawm phawt chuan khawiah pawh awm ila, khawiah pawh hna thawk Ila,  kan ngaihtuahawm lo vang tiin chhungkua din dan tur thu pawimawh, hmantlak tak tur, fate nun kawng kaihruaitu thu mawi tak min hrilh thinte kha ka theihnghilh thei tawh lo. Khawvel parmawina te hi Lal Isua tel lo chuan engmah a nih lohziate kha min hrilh thin a, chu chuan khawvel hausakna te kha it lovin, khawvel mite thlakhlelh mai maiah ka lo ngai a, a va han nuam tak em!! Chuta min la hrilh zel chu maw? ram hruaitute an pawimawhziate kha thiam takin i sawi a, ka rilruah Lalpa duhzawnga ram hi hruai a nih chuan Lalpa malsawmna leh duhsakna kan dawng dawn a, Lalpa duh loh zawnga miin ram a hruai chuan ram pumin a tuar thin a ni tih hi a ni. Bible-ah pawh roreltute Pathian duhzawng ang a awm lo va, ram mipui pawh Pathian huatzawng taka an awm chuan Pathian hremna pawh a na hle a ni tihte min ngaihtuah chhuahtir a, a va han tha dawn em! Khawvel nun kawng kan zawh mekah nun chhawm tur tha tak tak min pe kha a ropui tak zet a ni. Mahse, thil pakhat lawk aw,  min hmangaih vanga hetiang hi min hrilh nge maw i nih a? Mahni hmasialna vang tih erawh ka sawi chhuak lo nangin ka thinlung chhungrila thu awm a ni a, min chhuahsan duh hauh si lo, keimahah thil duh leh beisei  i nei ang a, chu i duh chu i hmuh hnuah khawvel parmawina tlanin hun i hmang dawn nite hian kan hria a, chu chuan min ti tawt leh ngut ngut thin pek a, hahthlak, hahdam sia min siam dan lah i thiam si a, nun khua tak tak ngaihtuah si lo hian khawvel parmawina thliak duhin, nawmsak duhin, thiltihtheihna duhin hun hman nuam i ti dawn tlat mai a. Engtin tak chuan keini pahnih hi awm ang i maw aw?? ‘Intentawnna’ mai chauh kan inhnutchhiah mai ang tih a va hlauhawm si em.. Ka hmangaih hman che a, min ngaihsak leh si lo maw?! Ka lakah chuan i rawn inbun ruak fai vek emaw ka lo ti a, ka rilru hminna turin theihtawp i rawn chhuah a, sum sen pawh kha i ui lo, sum lah i nei viau bawk si a, sum sen dan i ui loh dante kha mak riauna a nei, i neihin a tlin bik loh thleng thleng khan pawisa i hmuam tun mai a, chuta ka ngaihtuahna lo lut ta chu i duh i hmuhna tur chuan tawngkam sen i ui lo va, thutiam zut zut lah i awlsam bawk si a, pawisa lah i hmatheh a, retheite hmangaih ber ni awm tak khan  nungchang kha in thle no vel a, Pathian tih ber ni awm ang ziazangin nungchang i thlak danglam thei tih chen khan min hmuh chhuahtir a ni. Rethei zingah an mahni hmangaih ber ni awm takin awm dan i thiam a, zu inho zingah lah lawm i hlawh thiam riau bawk nen, an zu in tur lah i pe hreh si lo, mi tin maiah khan fel hun bi i nei a, i ka pawh zen ila min seh lo vang, ni danga i huat thin em emah pawh hlim hmel pu ni awm takin i nui khi ver ver thei si a, i awmna kohhran, khawtlangah lah fel nih i hlawh a, i sum i ui lo va. E khai! Engtizia ta nge ni le, min hmangaih viau emaw ka tih kha min lo hmangaih reng reng lo tih ka hmu chhuak ta. Min duhsak em em emaw ka tih kha duhsakna thinlung tak tak a ni lo. I duh i hmu a, hre lo ang maiin maw i awm leh si a, theihtawp i lo chhuahna chu mipuite chung lama thut a, lalthuthlenga thut a, thiltihtheihna nena rorel chu lo ni lekin.. Awle, chu pawh chu lo ni ta se, ka la hrethiam zel tho a, hriat thiam loh erawh ka nei a, chu chuan ka rilru a tina vawng vawng nia. Hmangaihtu der lakah fimkhur rawh aw! Duhsak tak leh ram hmangaihna thinlung nen kan vote hlu tak kan lo pe ve che a, kan thlang lal che a, mi mal induhsakna chu eng teh ual-ah pawh ka ngai lo va;  mahse,  ram leh hnam tana i thutiam tha tak takte kha tihpuitlin loh i ngah lutuk a, tawngkam thiam ringawt a,  hna thawk tha leh mang si lo,  i lalthuthleng atang khan duh zak zawng vulh len i tum a, ram hmasawnna tak tak hnathawh ai chuan i lalthuthleng nghehna turin mite i ti lawm a, i hote tihlawm i duh a, hna i pe teuh teuh a, hnathawk tha tak tak mang si lovin sum i pe teuh teuh thin te, ram in hmasawnna ke a pen hleih theih loh laiin i lalthuthleng atangin i insawifiah kuk kuk reng a, inthlan a lo hnai a, i zia i thlak leh a, tute emaw khawngaihna i zawng leh duk duk ang a, thusawi lah i thiam si a, mite rilru hneh dan tawk lah i haichham mang bawk si lo. Kei chuan ka hua che a ni. Ka ram ka hmangaih tan hian nang ram hmangaih inti kha thiltihtheihna kan pe sauh sauh che a, hnathawh mumal sawi tlak i nei lo va, i tih tur i tih loh avanga insawi mam ngai reng mai te hian mipui thinlung a ner sawng sawng a, mipui lah kan der thawng ve si a, kan arh hluai thin a, kan zuai leh fo tih i hre chiang hle a ni. I nunah Pathian tihna reng reng a lang lo va, kohhran velah chuan mi tha ber ni awm ziazangin i inpho lang thiam a, veng chhung, i bial chhungah mitthi an awmin rang takin pangpar nen i thleng vat zel bawk si a, ram ro hnutchhiah thei lo khawpin nangma tanghma i hai thin hi ka haw tak zet che a ni. Lemchang nunah fimkhur tlang ila, dawtsawi thiam lakah fimkhur tlang ila, thusawi thiam tak lakah fimkhur tlang ila, bum tur zawngin an rawn nui khi leh vur vur ang, chumi lakah chuan fimkhur tlang ila, inthlan dawnah mi thenkhat an ngam awm tawk te teah chuan sum nen an rawn che leh dawn a, chung lakah chuan fimkhur tlang ila, mahni insawi mawi,  insawi thiam zul ho lakah fimkhur tlang ila a va tha dawn em!! I lo en tur chu maw? ram tana hnathawk tak tak duh mi an ni dawn em? kan ram hmasawn lo tak tungding duh tur tak tak an ni dawn em? Huaisenna nena hnathawk ngam, thu sawi ringawt ni lo, thusawi lama rum awm taka lang, a tak taka hnathawh hmuh tur awm chuang si lote chu hnawl ngam thak ta la, i laka tha ringawt pawh an ni chuang lo, kan ram tan hian hna an thawk em? tih zawkah kan thlir tur a ni. Mi tam tak chuan politics khelh hi hausakna emaw an ti tawh a ni. Kan rilru hi a dik phawt a ngai. Rilru a dik loh chuan kan ram hian hruaitu tha a nei ngai dawn lo tih hi chiang taka lang chu a ni. Hengho hian min rawn chim tak tak chuan min hmangaih/duhsak ber emaw tih a awl a, ka tihsual tak em em chu thu a thiam si a, kei chuan ka hriat loh laiin ka thinlung ka lo hlan hman der tawh chu niin. Ka hmangaih via che a sin le!! tih hi ka tihsual lian tak chu a ni ta a ni.