Sawi hlawh tak, hmun hrang hrang atanga do hlawh Citizenship Amendment Bill 2016 chu Rajya Sabha-a session neih hnuhnung berah pharh a nih hman ta lo a. Tun sawrkar term kal lai chu inthlanpuiin a nangching tawh mai dawn a, house thiah a nih dawn avang leh session chu tiam chin awm loa tih tawp a nih avangin CAB chu a thi ta hrih a ni.
Lok Sabha-ah khan CAB hi a tlang tak avangin Rajya Sabha-ah pawh tlang leh ta sela President-in a hming a ziah hnan rualin East India lamin kan duh loh em em Bill chu Dan puitling a lo ni dawn ta a. Hlawhtling ngat sela chu ram pum buaina a thlen bakah inpumkhatna pawh nasa taka tichhe thei a ni dawn a. A hlawhtling ta hrih lo hi chu thil lawmawm tak a ni.
Mizoramin CAB a do dan kha thlir letin a tha thawkhat hlein a lang a, MNF sawrkarin a do dan duhthu a sam lo nia hriat na lian tak a awm chungin anni pawhin theihtawp an chhuah a. State dangin ‘CAB a tlang a nih chuan NDA atangin kan inhnukdawk nghal ang’ an tih ang kha mipui lamin an phut ni berin a lang a, nakin zelah pawh sawrkar hian na tawk taka hma a lak chu a la ngai dawn tho thoin a lang a ni. Political party te leh NGO intelkhawmte an fakawm hle a, tualchhung leh state pawna fehchhuaka hmalakna awmte kha a hlutawm tak zet a. Kan MP-te pawhin tun tum thil thlengah hi chuan mipui an thlamuan zo khawpin a lang bawk a ni.
Eng pawh nise, CAB hi a la tawp mai dawn lo a, central inthlanah BJP hi a fawng chelhtu lama an tang leh a nih chuan a ngai ang thovin kawng an zawhtir leh thei a. House hniam zawkah pass-tirin Rajya Sabha a tlang chuan Dan tihbaiawm tak kan nei thei dawn tih a lang thei mai awm e. Tuna pawimawh berah chuan Lok Sabha inthlanah hian Mizoram tana huai taka auchhuak tur kan thlanchhuah ngei a ngai a ni.

Tun tum chu 1966 March, rambuai laia hek ka tawh chanchin ka’n ziak teh ang. Kan upa thawkhat ve ta a, rei pui ka KA HUANG thei pawhin ka ring ta meuh lo e.

Rom 12:19-in, “Phuba reng reng keima lak tur a ni, Keiman ka thungrul ang,’ Lalpan a ti,” tih hi awm lo sela chu kan chhe thui viau ta ve ang.

1966 khan Civil Surgeon Officer-ah LDA hna ka thawk ve a, office-a ka thawk lai chu Assam Rifles-in min rawn la nawlh mai a, Quarter Guard-ah min dah ren-rawn a, chuta tang chuan District Jail-ah min sawn a. Jail-ah chuan fin kherek dan kan zir thiam hle. Vai sipai vek khan min veng si a, kuhva leh meizial kha kan duh sia, an phal si lo a, U Tlangliana, NCL lo awm thang tawhin, “Mess tin chhawng sei chiah a mawng berah a zial, a dawtah kuhva, a chungah chaw, a chung berah bawng chek dum ngun mai duh ula, an han hawng ang a, ‘DUT’ an ti ang a, an pass mai ang,” tih min hrilh a, kan chhungte kan hrilh a, mei zial leh kuhva kan nghei lo.

A tawi zawngin sawi mai loh chuan a sei lutuk hma khawp ang. Phai lam min panpui ta a, Masimpur concentration camp kan ti mai a, Puan inah, a lum tih mai baka lum a ni. Inbual theih si loh, an mi hrem lah chu an tina em em mai a, MNF helah min ngai vek tawh mai si a, ramhnuai mi tak kha chu a awm pawh kan awm âwm lo e. Khawlaia kal mai maite Aizawl jail atanga chhuak Thianghlima, Mi A te, Tuikuk Sampujoya te kan ni nuai mai a, U Thangdela te kha a thau ve tehlul nen, an chungu sawhtir a, a khel emaw ni lai khan a chhiat phah nghe nghe nia. Kan khawngaihthlak teh asin. Chhantu eih pawh kan nei si lo. Engchennge kanawm tak pawh ka hre lo, kan bal em em mai a, Pukri (dil tui luang chhuak lo) a inbial kan dil pawhin an phal si lo. Kei lah hi gastritis nei (pumpui thur), damdawi awm tawh si lo. Zan khat chu a na a lo chhuak a, ka te vawng vawng mai a, Jem Lalsanga’n vut a dil a, tui nen an chawk a, an dah fim deuh a, min tintir a, a zualpui chu a reh. A tukah field hospital-ah min admit a, an han dawheh khawp a, indonaa manin min chhal nia! Chuta ka awm hlan chuan ka thiante kha pukriah an lo han inbualtir vek a. A hnuah Silchar jail-ah an sawn ta vek si, dam e, dam lo e, min discharge a, min mal hruai phei ve ta a. Masimpur-a ka awmpui zawng zawngte kha an lo inbual faitir vek tawh sia, kei chu min man ni atanga la inbual lo ka ni si, a lum ropui si. Inbualna tui kan han dil a, bucket khatin mi 3 an tia, kan hnial nasa mai. A tawpa tawpah bucket khatin min bual ve ta a. Silchar jail chu jail chhungah na na na chuan kan thawl deuh. Chuta tang chuan a then Guwahati, a then Nowgong, Tejpur-ah te min thawn darh ta vak a. Kei chu Nowgong special jail-ah min thawn a, kan CM hlui, Lalthanhawla te, J.Thanghuama te, mi lian tak tak ka tanpui a. Buk tha, a chung tile chi kha 3 chauh a awm a, 4-na chu di, Buk No. 5-na a far nasa em em a, ka awm a, buk hotu deuh angin ka awm a (to be contd.)