Ka thian duh tak

V.Kûngtea, Awmhar Cabin -
Ih maw, ka thian, nang lo chu ka thurûk vawngtu an awm mawlh si lo va; hetia, hmêl hlim lo ka hmuh fona chhan che hi han hre vek lâw lâw la, ka duh a ni.
Nang chu, eng tik lai mahin min phatsan ve dâwn lo tih ka hria a, ka mangan lai leh ka lungngaih lai ber pawha ka innghahna awm chhun i ni a, i kiangah hian ka thla a muang thîn. Dik tak chuan ka nu leh pate ai pawha ka thurûk ril ber ber hretu i ni a, thurûk hrilhna tûr thian tha leh rinawm ka neih che avângin, ka thian ni tûra nang min petu leh a siamtu che Pathian hnênah khian lâwmthu ka sawi châmchî thîn asin. Mahse, kei aiin i han kal hmasa chu a ni a, i thlarau zahawm tak khân mi a chênchilh fo va, ka thla erawh a muang a ni. I chawlhna in nuam tak atang khân ka thurûk hi lo hre nawn leh mawlh teh aw…
Ka thian, ka hmangaih che a, ka hmangaih takzet che. Ro, sum leh pai ka nei lo. I tân tih theih rêng ka nei hek lo va; mahse, ka hmangaih che tih tal hi i lo hre nawn fo dâwn nia. Kei zawng, i hriat angin natna khirh leh tuar zawh rual loh ka veiin ka pai mêk a, kalsan thut thei che dinhmunah hian ka la ding reng a; chuvângin, ka bul hnaiah hian lo tâp chawt mai la, ka duh fo va; mahse, tisa mit atang chuan ka hmuin ka be thei tawh si lo che. Biak theih, chhâwn theih, han titipui theih chu ni la, ka thian; sawi tûr ka va’n ngah êm! Mahse, nang chuan i dam lai khân ka duhzâwng leh duh lohzâwng, ka thinlung zawng zawng min hriatsak vek a, na taka ka awm i phal ngai lo a nih kha. Ka thlavâng i lo hauh luatah i nunna thlengin a tuar phah a, ka thian; ka tân hian i va han ropuiin i va han hlu chungchuang tak êm! I tân tih theih ka nei tlêm lutuk hi ka inhaw ngawih ngawih thîn. Ka tih theih tâwk lah sawi pawh a zahthlâk a, chapopui thei rêng ka ni lo.
Hei ha! Ka hah. Ka na a rawn chhuak leh ta! Ka thian, zânin hi ka daih meuh ang em maw? I kalnaa ka rawn kal ve a hnai ta takzet mai. Heti hian, khawvêl chu kan chhuahsan ve dâwn chu a ni ta mai si a. Ka thian, nang tal chuan min phatsan lul suh aw? Ka khawvêl nî a kina i hnên ka rawn thlen ve tikah chuan a va nuam dâwn êm! I dam laia ka tâna i inpêkna zozai avângin i thih hnu lehzêlah pawh ka khawvêl nun a nuam a, nang vângin ka nui a, nang vângin ka hlim a, nang vângin ka lâwm a, nang vângin ka thinlung a hausa a, nang vângin chakna ka neih phah a, nang vângin ka nun kawng a dik a, nang vângin mi tha ka ni a, nang vângin ka lang mâwi a, nang vângin ka dawhthei a, nang vângin harsatna tam tak ka paltlang a, nang vângin ka phûngthlu a, nang vângin ka thilphal a, nang vângin ka hriatna a zau va, nang vângin ka engthâwl a, nang vângin sual lam ka ngaihtuah ngam lo va, nang vângin ka thlarau boral mai tûr chu chhandamin a awm ta si a. Ka thian, nang zet zawng thian nih i va’n tling tehlul êm! Kei chang lo, mi dang tân pawh thian tha i ni a; i chanchin hi sawi a nuam thîn hle mai. I dam lai khân i hming hi a lo thangin i lâr tehlul nên, i thi ta chêng a, mi tam takin an lo hai leh lâwi si che a, ka rilru a na vawng vawng thîn.
A thuhrimah, mi hian eng hmuhin nge an lo hmuh chia an lo thlîr che ka hre lo; khati tak maia hmêlma leh dotu i’n ngah tâk mai kha. A mak a ni, a mak thlâwt mai! Court hial i han thleng a, Pu P. Lat-a hmaah meuh i inlan a ngai a, thil i ti sual lo tih hre reng hlawm mah se, thiam thu i sawi an phût tlat a, “Thi rawh, thi rawh,” tiin an au nawmnah vêl che a; khatih laia ka thin an tihrimzia mai kha aw… Mahse, nang chu i la ngâwi fan a nih kha. I dikzia hi mi hian kan la hre dâwn chauh. Lo lungngai rêng rêng suh, ka thian. Hmêlma tam tak nei mah la, i lama tang tlat kan awm ve a nia. A sâwt emaw, sâwt lo emaw, a enga pawh chu ni se, i dikzia leh i thiamzia hi ka hnuk a chah thlengin ka dam rualpuite hnênah hian ka la sawi zêl dâwn. Thûin ka ziak ang a, kâin ka la hrilh zêl bawk ang.
I chanchin hi ngaihventu an lo awm ve nual tawh a, a thenin an âwih a, a thenin an pawm duh lo va; mahse, i lo pian atanga i thih thleng chanchin chhiar tûr lehkhabu an lo siam hlauh va, chumi tanchhan chuan kei pawhin ka sawi ve thîn. Ka thian, nangmah tantu hi kan lo pung ve zêl e aw? Mahse, kan la tam rih lo khawp mai. Tûna la pawm duh lotute pawh hi eng tikah emaw chuan loh theih lohvin an la pawm ngei dâwn bawk.
Sum kan duh lutuk hi a pawi. Hausak kan châk lutukna hian kan mit a del fo thîn. Chu chuan, i dikzia hretute pawhin huaisen takin an la puang ngam lo zâwk a ni. I thih hnûah pawh nangmah dotu an lo la awm cheu mai hi a mak zozai ka ti. Luhlul leh ngawltâwt chhuaha i thih chhan âwih duh thak lote hi engtia tih chi nge maw an nih le? A châng chuan, kut thawh mai te pawh a châkawm. Mahse, nang chuan phuba lâk i remti ngai lo va, chu vâng chauh chuan ka inthunun hrâm hrâm thîn.
I thih ni kha ka mitthlaah a la châm reng mai. Ka thian, khati tak khân a ni maw, mi i lo hmangaih le? Keimah vângin tihduhdah tinrêng i lo tuar a, kut thak hnawih nân an lo hmang che a, khawlaiah a mualpho theih ang berin an lo chai che a, chil an chhâk che a, an nuih che a, thisen luang zawih zawih chung pawha i kâ a âng ve lo. I lo va han tuarchhelin i va han dawhthei tak êm! Chu chu maw, ka thian hnaivaite’n an âwih duh lohva an pawm duh loh? An la hria ang.
Ka thian, thil hi sawi vek dâwn ila, lehkha phêk leh lehkha tui hian min daih dâwn chuang lo. Kei pawh ka chau ta! Mahse, hei chauh hi a tâwp berna atân ka han hrilh ve leh hrâm teh ang che.
Ka thih hunah chuan ka chhûngte leh ka thiante hnênah eng mah rochun tûr ka nei dâwn si lo va; a hring a hrânin lo lang thei tawh lo mah la, an thinlungah tal nang lo awm la, i dam laia i dikzia te, tih sual i neih lohzia te, i hmangaihzia te i lo hriattîr mawlh mawlh hlawm dâwn nia aw?
“He zinna ram khawvêl thiante,
Hlim leh lâwma ka lo pâwlte;
Lâwm leh lungngaih ni atân ka lo ruat thin,
Mahse, dam chhûng nun zauvah hian;
Khawdur châng a lo awm thîn a,
Chuti’n thian ka ngaihte’n min lo phatsan thin!
Danglam ngai lo Lal Isu,
Nangin min phatsan ngai lo.” – C.Dinthanga.

DOWNLOAD OUR APP

Read latest news on your phone

Ka thian duh tak

Latest News & Chhiar Hlawh