Zaithiam Vanlalhmangaiha leh Thawhlehnaniropuia (Puipuia) te channa Mizo film thar 'Ka U Liana' chu Inrinni zan dar 8:00pm hian Vanapa Hall-ah tlangzarh a ni dawn ta. 'Ka U Liana' hi Zote Entertainment te film siam niin, Runmawi te chu co-Producer an ni. Premiere hun hi a hmunah mi tam zawkin an en theih nan ticket siam a ni a, a hmunah lei tur a awm ang. 

A story hi Aaron Malsawmdawngzuala ziah niin, rualban lo hmuhsitna tawk nasa tak unau chanchin tarlanna a ni - mittui nena en ngai chi a ni mai thei. Film siam lama hnuhma nei tha tak Mike-a kutchhuak a ni a, en manhla tur tak a ni ang. 

Durtlang North tlangval Vanlalhmangaiha chu a changtupa ber a ni a, film-ah hian sam a zuah avangin i hai mai thei! A changtu nu ber hi Lunglei nula Esther Lalnunmawii a ni a, ani hi chu film industry lama sulhnu lo nei tawh a ni a, a thiamzia sawi nawn a ngai lo. 

'Nutei Thingpui Dawr' ah pawh hneh sawh taka lo inlan tawh Ruthi Chenkual kan hmu leh dawn a,    
Thawhlehnaniropuia pawh Ka U Liana thianpa tur a ni ang. Anni bakah hian local tv vela kan hmuh thin Lalteii Fanai a inlan bawk a, Robinson Sailo a la awm cheu bawk.

Tun thla tir lam khan a OST 'Ka chelh ngam lo che' tih chu tihchhuah a ni a, a hit zia sawi nawn a ngai lo. Zaii Hauchhum aw mawi zia leh zaithiam zia pholanin a awm a, thlirtu mipui rilru a khawih hle. 'Ka chelh ngam lo che' tih hla hi Zaii Hauchhum phuah hi a ni nghe nghe a, music leh recording hi Rpa Ralte kutchhuak a ni bawk.