Article

Ka vei si, a tihngaihna tak ka hre der si lo

Admin - Feb 28, 2021

Ka vei si, a tihngaihna tak ka hre der si lo

Tun atanga reilo te tak tak, kum hnih kum thum lekah hian Mizoram chhim lam hi kan kawtchhuah a nih tan hmel ta tak tak a. Kum 2021-ah Sittwe (Akyap) lawngchawlhna hi hawn a ni dawn nia sawi a ni a. Mizoram chhim tawp, Zochachhuah rawn thleng tur kawngpui pawh kum hnih kum thum lekah zawh fel a nih hmel bawk. India pawisain kawngpui hi siam mek a ni a, India company-ten kawngpui laih hna hi thawkin helho leh mi sual tangrang laka an him theih nan India sipai leh Myanmar sipaiten hnathawktute hi an veng reng mai a ni.

Zochachhuah atanga Lawngtlai rawn pan, kawngpui laih hna chu zaa 96 vel zawh fel a ni tawh niin PWD lamin an sawi. Khawchhak hret, Saisihchhuah lam ve thungah chuan, Myanmar sorkarin kawngpui lian, motor intlanpelh zut zut theihin a rawn sial chhuak tawh a, blacktoping thawh mek a ni. Chhimtuipui lui kânin lei (bridge) an dawh ang. Sangau leh Saisihchhuah inkar pawh kum hnih chhunga siam zawh ngei tumin sorkar laipuiin hma a la a. PWD-in DPR a siam a, BRTF-in an thawk ve thung ang, hemi atana pawisa hman tur pawh sanction a awm tawh nghe nghe.

Kum 2025 chho-ah hi chuan Mizoram chhim lam hi kan kawtchhuah a ni ngei dawnin a lang ta. Kum 2010 kuma Pu LT Muana, IFS-in, “Joseph, he look east chet velna hi i hmu hman dawn a nia, reilo te-ah tihhlawhtlin a ni dawn,” a tih kha ka hre chhuak leh thin. Kan ram thil kal dan hi a mak ka ti thin. Tripura lam atangin Kawrpuichhuah (Tlabung) hawiin kawngpui lian tak a lut phei ruah dawn a. Silchar atangin Tuipang thlengin national highway a lut phei ruah dawn bawk a. Heng kawngpui sial hna hi tunah chhun zan zawmin an thawk mup mup mai. Kawtchhuah atana chhim lam nihphung tur: I google keu la. Aizawl atanga Delhi kawng hlat zawng (road distance) han en teh. Kilometer 2,374-a hla a ni. Delhi atangin bungrua lian tham, khawl thilte ka chah thin a. Aizawl a lo thlen meuh chuan thla khat chuang (ni 40/45) a thang thin. Google-ah vek khan Aizawl atanga Kolkatta hlat zawng han en ve leh thung teh. Kilometer 1,492 a ni. Bungrua ka chah thin tho a. Kolkatta atanga Siliguri, Guwahati, Silchar, Aizawl lo thlen nan hian thla khat tho a ngai mai thin. A rawn kal rei zawng hi chu thukhat nise, a phurh man (freight) hi a to em em mai a, kg khat Rs. 15-25 inkar vel lai a ni.

Tuna thil awm dan tur ni chu. Kolkatta atanga Sitwe port chu kilometer 539 a ni a. Darkar 24 chhungin Sitwe port a rawn thleng chho dawn a ni. Sitwe port atanga Zochachhuah chu kilometer 287 a ni. Darkar 12 chhungin a lo thleng ang. Zochachhuah atanga Aizawl hlat zawng chu kilometer 343 a ni. Ni khatah a lo thleng var var dawn. A rei thei ang ber pawhin chhut ila Kolkatta leh Aizawl inkar bungraw lian tham pawh nise kar khat chhungin alo thleng ang. A phurh man (freight) chu kawng chanve zet tuipui chunga a kal dawn avangin kg khat Rs. 10 aiin a sang dawn lo hrim hrim tih a lang.

Chu mai ala ni lo. China leh Burma inrina province, Yunnan province atang chuan rel kawng lian chi hi Sitwe port thlengin a service tan der tawh niin an sawi a. Sumdawnna tak tak ang chuan la tlan lo mah se an ruahman dan atang chuan Express Train hi Yunnan to Sitwe a tlan pur pur dawn a ni. Mizoram atanga Yunnan province lawngchawlhna Ruili Port chu kilometer 1,141 chauha hla a ni. Ruili port chu Burma leh China inrina, Muse khawpui bul lawka mi a ni. A thlang lawkah chuan Bangkok a awm a, Aizawl atangin kilometer 2,001 chauha hla a ni.

Ka suangtuahna hi a virvel chiam chiam a. Sumdawn hi a va nuam dawn em! Khawsak hi a va nuam dawn em! Ram dang thiamthil lak luh a va remchang dawn em! Kan ram thilchhuakte hi mamawh ve an nei a nih chuan Thailand leh China lama phurhchhuah a va nuam dawn em! Khawchhak lam (SE Asia) atanga India mainland-a bungraw rawn kal tur leh tuifinriat atanga bungraw rawn lut tur hian Mizoram a rawn tlan pel zung zung dawn a nih chu. Kan tu leh fate hi an va vannei dawn em. Entrepreneur nih a va nuam dawn em!!!!!

Hei erawh hria ila: Israel mi thiam - economist ni bawk, venture capitalist ni bawk, entrepreneur ni bawk, Daniel J. Isenberg-a chuan zirchianna a nei a (He a zirchianna chungchang hi a hranpain ka la rawn ziak ang). Khawvel khawi ramah pawh - ram hruaituten entrepreneur-te tan kawngka zau taka an hawn loh a, ram kalphunga sumdawngte tan awlsamna a zawnsak loh chuan ram economy a thang thei lo. Ram hruaituten insawrbingna bik an neih loh a, a ramin theihna (potential) leh thil chhuak (resource) a neihte sumdawnnaa a chanter thiam loh chuan economy a thang thei lo.

Chu mai a la ni lo. Kan university leh college zirtirtu mi thiam rualte’n hlawh hmuh nan chauh ni lo, ram mipui hmasawnna atana tha an thawh loh a, school leh college-a thiamthil peipunna (skill development) lam an kalpui loh chuan engmah a kal fuh thei lo. Zirtirtuten school-ah entrepreneurship an zirtir loh a, hmabak lam thil ni lo, hmanlai chanchin ringawt an zirtir chuan hma a sawn theih lo.

Kan zirna inah science leh mathematics subject hi a bulthut kan hriat thiam theih nana mahni tawng ngeia kan zir loh chuan a fuh thei lo. Science leh Mathematics hi hmasawnna bulthut a ni si. Ram hruaituten privatization kalpui lo va, engkim mai sorkar tihtir an tum chuan a hlawhchham thin. Mipui nawlpui pawhin pawisa hi thawhchhuah tur a ni a, khawi atang emawa lokal tur a ni lo tih kan hriat a, mahni ram thilchhuak ngaihsan inzirtir nachang kan hriat loh chuan engmah kan ni lo vang. Thil reng reng hi a nih dan tur anga kaltir lo va, “Hei hi chu kan tihdan a ni lo, kan office kalphung a ni lo,” tih vel ringawta kan kal chhung chuan awmzia kan nei lo vang. Isenberg-a thil zirchhuah hi a va dikin a va tha em em ve aw, ka ti.

Chhim lam hi kan kawtchhuah pawh nise: Mizoram chhim lam hi kan kawtchhuah pawh nise, motor ke 24 nei chi rawn tlan hum humin chung motor liante chuan bungraw chi tinreng rawn phur lut zut zut pawh nise, a ram chhunga cheng mipuite hian kan theihna kan tahhriam lohva, hmathlir (vision) leh tih tur inchhawp (mission) nei lova kan lo nghah liam ve mai mai erawh chuan kan chan hian maian chan pawh a tluk lo vang. Chu sumdawnna kawng thar rawn inhawng tur chu hmang tangkai ngei tura kan inbuatsaih a va hun em!!! Industry lianpui pui kan siam thei lo a nih chuan industry te reuh te te tal lo siam a va hun em. Agri-Business farm lian pui pui kan lo buatsaih thei lo a nih pawhin te reuh te te tal kan lo siam tan tawh a va hun em!!!

Khawchhak lama missionary tirchhuak tur pawhin Burmese tawng, Karen tawng, Chinese tawng, Thai tawng, Vietnamese tawng kan lo zir tan tawh a va han hun em!! Sumdawnna kawngah factory lian kan siam thei lo a nih pawhin Singapore tihdan anga Carrying & Forwarding (C&F) Agent, Shipping Agent, Logistics Agent, Warehousing firm te nei tura kan lo inbuatsaih a va hun ve le aw! Heng zawng zawng hi tawngtaw tih mai chi pawh a ni lo, a zira zir, a tre-a training theih vek a ni. Kan thalaite hian “tih tur ka hre lo,” an tih hi “tih tur kawhhmuh” an ngai a. Sorkar hi ruahmanna (planning) siamtu tur a ni si.

Ka vei si a, a tihngaihna tak ka hre der si lo va.

Joseph L. Ralte