Aizawl August 30, 2024 : Vawiin khan Congress Party chuan Congress Bhawan-ah Friday Political Session an hmang a. AMC Corporator Rosiamngheta chuan thu sawiin, “Kalphung thar min zawrhtute hian dap chawpin sawrkar min kalpui leh si hi a pawi ngawt a ni. A bu kan nei an ti a, an sawrkar hma in an lo nei leh tawp si lova, an pang a dam tawh hi chuan thupha an chawiloh pawhin an daw mai," a ti.

Rosiamngheta chuan, "Kalphung thar hi tih hi lo awih vak tawh suh u, dap chawp a nih hi ka ti a, thalai pawhin an awih tan viauin ka hria. Phuahchawpah future a awm lo, indapchawp a, sawrkar kal dan tur bu thar neisa insawi ten a bu an zir chawp a. An Minister in kuminah chuan zirlai admission ti an tam avangin zirlaibu a indaih lo an ti ringawt a, an han ennawna admission ti tlem tum a lo ni leh hlauh sia, an pang a dam chuan an daw reng mai a ni," a ti.

"Kawng te pawh an sawi a, chhuanlam hi an zawng reng a, kawng te chu mi sawrkar hlim pawhin an lo siam ve tho mai a. Congress, MNF pawhin an lo siam tha daih tawh a, chhhuanlam neia kawng siam tha lo awmchhun chu ZPM chiah an ni. Thil hi an pha mai a ni," a ti bawk.

AMC Corporator chuan, "Min bei min bei an tia, kan bei reng reng lo che u, in thusawi tawh kan sawi chhawng mai mai a ni. Anmahni thusawi tawh hian anmahni a um ngat ngat mai a ni. Official te kaihruai thei tur politician hriatna nei te he ram hian a mamawh tawh. Pawisa lam hre huam huam ringawt, hmasawnna sawi ila harsa em em, politics hi pawisa siamna ni lovin ram siam nan hmang ila, chutah chuan kan tuchhuan ten nun nawm nan hmang rawh se," a ti.