ZALEN, Oct. 11, 2024: PWD Minister Vanlalhlana chuan Mizoramah kalphung thar sawrkar a din tawh avangin kawngpui pawh dawngdah taka enkawl a rem tawh lo tih a sawi.

Minister hian Zirtawpni khan National Highway 06 huam chhûnga Khamrang leh Kawnpui inkar kawng siam mek a tlawh leh a. “Mizoram sawrkar chu kalphung thar sawrkar a nih tawh avangin NH-06 pawh tun hma ang mai maia dawngdaha enkawl a rem tawh lo,” a ti.

“Kan châk lakna kawng ber a nih avangin englai pawha lirthei kaltlang theiha enkawl chhunzawm zel hi sorkar chuan kan tum tlat a ni,” a ti bawk.

Minister hian kawng chu chak taka siam a tul thu leh hetih rual hian mipuite harsatna thlen lo thei ang bera thawk turin thawktute a fuih.

Vanlalhlana hian Aizawl khawpui hmun hrang hrangah kawng chhe zual thawm that mek a nih thu leh ruahtui tla tam a ziaawm hunah a aia thaa kawng thawm thata siam a ni zel dawn tih a sawi bawk.

Hna thawk tha lote chu an dim dawn lo tih minister chuan sawiin, “Mizoram State Project Monitoring Committee mittlung lova hna thawkte chu an phu tawka an chung thu ngaihtuah a ni zel dawn,” a ti.